呢期日本熱搜詞竟然係番茄冷盤，以為因為係天氣熱，令人諗起呢種消暑嘅食物，卻估唔到竟然係同一篇關於居酒屋男女約會嘅文章有關。話時話，男女約會真係好似攻防戰咁，尤其係戀人未滿嘅男女，唔想無啦啦被人飛，有啲嘢真係要好細心至得o架！
番茄冷盤、芽菜同烏龍茶，竟然係導致男女分手嘅原因？話說早前日本有位叫做Mr. Fox嘅網絡作家，寫咗篇名為《男人在居酒屋點番茄冷盤、芽菜同烏龍茶的話應立即分手》嘅文章，作者稱透過男士喺居酒屋點乜嘢菜，就可以睇到佢嘅本質，而當佢點選上述3種食物時，女方應該果斷地同對方分手，佢解釋當中理由：第一，番茄冷盤係一種兩極食物，一係鍾意，一係就唔鍾意，如果男士喺冇問女方嘅情況下就柯打番茄冷盤，證明佢自私兼唔理女方感受，呢種人交往唔過。另一方面，番茄本身好平，但喺居酒屋就賣得勁貴，男人冇正確金錢觀，抵飛！第二，芽菜同番茄一樣，本身係一種平價食物，喺居酒屋點嚟食嘅話勁唔抵，又係金錢觀有問題，即飛！加上鍾意食芽菜嘅男人性格都係好孤寒，如果做佢女友未來真係要餐餐食芽菜！第三，烏龍茶明明係平價嘢，喺居酒屋卻賣到同酒一樣貴，所以都係金錢觀唔正確！仲有約得去居酒屋，就梗係想把酒談心啦，但係男方竟然飲烏龍茶，實在毫無情趣，又或者係自己唔飲酒，卻想灌醉女方，居心不良，呢種男人絕對要飛！
雖然呢篇文章講法相當偏頗，但卻成功令番茄冷盤成為日本網絡熱搜詞，仲有唔少人為呢三種食物伸冤，有日本網民表示，番茄冷盤配酒類係一絕，有人則表示鍾意居酒屋嘅環境，有飲有食仲要有傾偈空間，冇諗過竟然因為咁而被飛囉！
夏日炎炎，最好嘅衣着莫過於一件清爽嘅T恤，但係對於上圍唔夠偉大嘅女士嚟講，點可以營造出驕人嘅上圍呢？加胸墊唔係唔得，但喺高溫之下好易焗出熱痱，女士們不妨穿着呢件「妄想繪圖T恤」啦！由專門製作搞怪T恤嘅日本服裝設計公司ekoD Works出品，繼之前嘅「爆衫露Bra錯覺T恤」後，今次又一傑作！據ekoD Works稱，所謂妄想並非滿足男士嘅幻想咁簡單，每個女士着咗呢件T恤之後，上圍都會變得有睇頭，不過唔係用咗乜嘢最先進嘅豐胸技術，而係設計師巧妙地運用胸前嘅灰色格仔及陰影，令人睇落好豐滿，猶如身懷巨乳。咁係咪平平無奇嘅女士着咗呢件T恤之後都變成無敵身材呢？錯！查實佢係有死穴嘅，當大家從側面去睇嘅話，就會發現平坦上圍嘅真相，因此有人稱呢件T恤做「正面限定」嘅作品，售價3,888日圓（約276港元），於7月底至8月初期間喺日本發售，如果唔驚畀人笑假大胸嘅話，呢件T恤都幾有玩味。
究竟做晨操好，定夜晚曳曳好呢個問題，一直爭拗不止。朝早派表示做晨操，精神爽利玩得勁，曳曳完再瞓多陣，返工都零舍醒神；夜晚派則稱沖完涼兼食埋飯，飽暖思淫慾興致高，兼且可以避免朝早口中散發「仙氣」嘅敗性問題，甚至有人引用一個情趣用品商Lovehoney嘅調查報告，指絕大多數嘅男女都樂於喺晚上11點至凌晨1點呢段時間曳曳，相反僅得百分之十一嘅男女會選擇喺早上8點前曳曳。不過，早前英國嘅牛津大學及考文垂大學一項聯合研究發現，早上啪啪啪不但可以提升記憶力，仲可以增強語言表達能力。另外，根據雜誌《American Journal of Cardiology》嘅報道，男士如果每周最少嚟兩次晨操，可以減低百分之四十五患上心臟病風險。可能有人話不如朝早去做運動咪仲實際，起碼可以獲得減肥嘅效果。根據研究指出，原來晨操亦有減肥作用，因為曳曳時身體會因刺激而釋放一種叫做苯乙胺嘅物質，而呢種物質具有降食欲嘅作用，換言之，晨操令人減少食欲，從而達到節減肥效果。
撰文：魂