重鹹嘅成人漫畫畀到漫畫迷視覺上嘅刺激，但係輕鹽嘅成人漫畫，則予人一種清新嘅感覺，若然加埋充滿女人味嘅熟女角色，就更加吸引。想體驗當中滋味嘅話，絕對唔可以錯過日本成漫家東Tylor嘅代表作《姐姐是個激進型》喇！
早喺千禧年初開始漫畫創作嘅東Tylor，當時活躍於校內嘅漫畫部，及後跟同學合資推出同人誌，雖然畫工稚嫩，但係透過呢次機會，不但令佢嘅創作經驗提升，同時更認識到唔少職業漫畫家。高中畢業後，佢開始創作成人漫畫，隨住畫工愈嚟愈成熟，建立獨特清新兼簡約嘅畫風，而喺故事嘅鋪排上，節奏夠明快，同時充滿劇力，佢最鍾意繪畫「姊系」漫畫，即係以熟女為題材嘅作品。
清新嘅畫工加上誘人嘅熟女魅力，令佢火速喺成人漫畫界人氣急升，2007年時更獲得喺成人漫畫月刊《Vitaman》發表首個短篇作品嘅機會，正式展開成漫家嘅生涯，而喺2008年11月迎嚟首本成漫單行本《戀愛聖經》。專心喺成漫界發展嘅東Tylor，好似一部開足馬力嘅跑車一樣，每年推出1至3本作品，雖然產量多，但係質素冇下降，反而水準愈嚟愈好，好似《Soft Madam》、《友誼辦公室》、《艷肌狂人》、《害羞慾望姐姐》、《發情千金的求歡新性活》等等，都被視為優秀作品。
而講到東Tylor嘅代表作，就非《姐姐是個激進型！》莫屬，當中收錄咗9個短篇作品，包括《好好先生與模特兒胸部》、《夜勤的觸摸天使》、《榮譽的豐滿胸部》、《充滿熱帶風情的姐姐》、《香甜多汁的π》、《尋找面紅耳熱物件》、《窩心伴侶》、《快感☆圖書館》同《喜歡濃酒的女孩》。有日本成漫家稱呢本作品體現出東Tylor追求清新畫面嘅風格，整潔嘅構圖令人耳目一新，而情慾場面亦處理得恰到好處，鹹度啱啱好，絕對係一本高水準之作，尤其係《好好先生與模特兒胸部》同《榮譽的豐滿胸部》呢兩個短篇故事，更係備受好評。
《好好先生與模特兒胸部》講述男主角內野係一間模特兒事務所嘅助理，卻一直受到外表美艷而內心卻相當魔鬼嘅女社長仙道欺壓。一直想辭職嘅佢，唯一令佢想留低嘅原因，係因為佢暗戀模特兒美佐子。有晚佢收到美佐子離職嘅短訊，並拜託佢代為通知女社長。原來女社長早就得悉美佐子跟另一間模特兒事務所嘅男模特兒拍拖，並且因為懷孕而離職，令佢心情相當惡劣，故此當佢見到內野時，就將憤怒發洩喺對方身上。
《榮譽的豐滿胸部》嘅男主角土屋係個水電維修員，暗戀咗一間美容院嘅美艷熟女老闆娘有村好耐，經過一番努力，佢終於可以同有村熟落起嚟。有晚喺美容院附近工作嘅土屋，突然收到有村嘅求助電話，原來美容院水喉漏水，土屋維修好後，得悉原來當日係有村生日，見到有村自己一個人度過，於是佢即刻去買紮玫瑰花送畀對方，有村便以一次按摩服務作為回禮，卻估唔到過程中土屋竟然有生理反應，有村決定幫土屋解決生理需要。
書名：《姐姐是個激進型！》
作者：東Tylor
出版：竹書房
頁數：178頁
撰文：魂