能夠成為一位吸睛嘅模特兒，迷人嘅樣貌固然唔少得，除此之外，仲要有火辣嘅身材，咁先至可以喺索女雲集嘅模特兒界中打響名堂。洪河娜喺南韓模特兒界打拚多年，所憑嘅正正係兼備上述兩種優點，加上佢自信心爆棚，人氣一直有增無減。
唔少南韓模特兒都話自己初時冇諗過入行，以模特兒作為事業，相反洪河娜自小夢想成為模特兒，喺就學時已經從事模特兒工作，以半工讀身份勇闖模特兒界。而佢同好多模特兒一樣，最初以平面攝影工作為主，後來憑住出眾外形，以及前凸後趷嘅火辣身材，加埋淡定表現，事務所認為佢絕對有條件嘗試大型嘅模特兒工作，於是安排佢喺車展上以車模身份登場，同時參加車模比賽。雖然佢一啲心理準備都冇，但憑住多年嘅模特兒演出經驗，以及大方亮麗又性感嘅造型，令唔少人對佢留下深刻印象，加上佢口才出眾，結果喺比賽中獲得亞軍，順利登陸車模界。不過對於事業有野心嘅洪河娜嚟講，又點會咁就滿足呢？之後，佢分別以賽艇女郎及賽車女郎身份，先後喺海陸兩種競速活動嘅賽場上登場，以低胸加上大騷美腿嘅性感制服示人，火辣熱力一啲都唔會比激烈嘅比賽遜色，自此之後，佢人氣急升，唔少人都被佢嘅堅挺雙峰迷倒。有見及此，事務所再推薦佢參加首爾車展王后比賽，結果阿妹以大熱姿態成功奪得冠軍。
河娜喺網絡上嘅人氣不斷急升，加上連番喺比賽中獲得獎項，對於一位新進模特兒嚟講，呢個成績絕對值得驕傲。好多時人紅咗，就會零舍錫身，收斂性感，以免形象被定型。不過洪河娜就唔係咁諗，皆因火辣身材係佢個人標誌，如果收埋一對迷人胸器，絕對會引嚟反效果，佢坦言自己並非一個有氣質嘅人，如果以氣質嚟吸引眾人目光嘅話，可謂揚短避長，只會令自己嘅模特兒事業走下坡，故唔會改變態度，繼續以性感造型示人。不過，如果大家有留意，早前阿妹作出唔少改變，講緊嘅係衣着方面，最初佢最愛穿着低胸T恤加超短熱褲嘅辣妹服裝，近排卻以貴氣嘅低胸連身裙示人，增添唔少女人味，獲得好評。對於大家嘅讚賞，佢感到相當高興，又自爆經過多次失敗，先至搵到適合自己嘅衣着品味及造型。原來佢試過走去曬太陽燈，將原本白皙嘅膚色變成古銅色，希望改變形象予人新鮮感，結果劣評如潮，甚至有人取笑佢變老咗。就係咁樣，河娜只好等膚色慢慢變番白，先至繼續模特兒工作。呢次教訓令佢明白到，關於形象設計嘅問題，最好事先同事務所商量，得到大家嘅意見後先至去實行。對於模特兒工作，佢覺得可以做得更好，希望未來有更多嘅演出機會。
簡介：講到洪河娜最養眼嘅部位，唔少人都認為係一對激凸嘅胸器，但係大家有留意嘅話，身材高挑嘅佢，擁有一對修長白滑美腿，加上高踭鞋，再襯埋套賽車女郎制服，認真殺死人！如果大家想睇到阿妹更多靚相，就要Click入呢個網站喇！
網址：http://cafe.daum.net/allset1
出生地：首爾
身高：172cm
三圍：35、25、35
撰文：魂