日本遊戲戰鬥系女角色所穿着嘅戰衣總係非常性感，老實講，如果佢哋唔係以性感造型登場，的確少咗好多觀賞性，好似今次介紹嘅呢個模型，就係其中一個好例子。嚟自手遊《Fate/Grand Order》嘅阿提拉，係一個性格高傲，又充滿理性嘅女劍客，戰鬥力相當強勁！不過佢最為粉絲所熱捧嘅原因，在於佢身上性感無比嘅戰衣，上身僅穿着Bra Top，而下身則着上一條勁Sexy嘅底褲，露肉度相當高，雖然係貧乳一族，仍然深受粉絲喜愛。今次佢最新登場嘅模型，忠實還原佢套性感戰衣嘅同時，性感魅力亦一啲都冇減弱，尤其係嗰條超性感嘅底褲，更係引爆大家嘅邪念，配合埋佢一身古銅色嘅肌膚，散發出健康性感美。除咗外形夠養眼，模型嘅手工亦做得相當細緻，好似裙上嘅布條，做得相當飄逸，仲有佢一頭蕩漾嘅白色秀髮，令整個模型充滿動感。此外，不得不提佢手上嗰把「軍神之劍」，霸氣得嚟，還原度仲相當高添！