仲講VR？大家咪嘮嘈住，雖然VR喺去年嚟咗個大爆發之後，家陣好似有啲靜咗落嚟，而導致呢個情況嘅原因，某程度上係同配合VR內容嘅影片、網站及遊戲仍未跟得上所致。不過隨住對應VR嘅內容愈嚟愈豐富，日本風俗界亦瞄準呢個市場，實行嚟個風俗革命。
自去年VR產品爆發式產生後，唔少人都對VR市場嘅潛力有相當憧憬，就連風俗界都希望能夠喺呢個市場上分一杯羹。事實上，早喺去年中開始，已經有多間風俗店密鑼緊鼓，將VR同服務結合埋一齊，等玩家可以透過虛擬實境，體驗到同風俗孃曳曳嘅樂趣，簡單嚟講，即係睇風俗鹹片嚟發洩慾火；另外，喺風俗營銷中VR所扮演嘅角色，係作為玩家同風俗店之間嘅媒介，玩家透過風俗店自製嘅風俗短片，不但可以喺虛擬實境中，睇到風俗店嘅環境及風俗孃嘅全相，甚至可以體驗一下風俗孃嘅服務，而玩家覺得滿意之後，就可以親身到風俗店幫襯。
如果要數日本首間將VR結合營銷嘅風俗店，必定係位於神奈川縣橫濱市嘅連鎖風俗店「Love Station」。呢間「癡漢Image Club」類型嘅風俗店，喺去年12月推出全日本首輯自家製VR短片，以介紹風俗店嘅服務。所謂「癡漢Image Club」即係風俗孃會換上唔同制服，同客人玩角色扮演遊戲，而最受歡迎嘅遊戲莫過於電車癡漢、夜襲、拘束等。亦因為咁，分別以呢幾個主題拍成3條VR影片，放上官網畀客人睇，內容除咗介紹服務，仲會有埋收費資料，畫面更充滿春色添！不過大家要留意，想睇片要先同風俗店預約同填Form，唔係屋企有VR眼鏡就有得睇o架。
網址：http://www.jr-renai.com/play.html
男士去風俗店玩樂目的係為咗一親風俗孃香澤，但卻換嚟玩VR加手作仔服務，又會唔會有興趣呢？位於東京嘅「Karinto VR」為日本首間VR風俗店。據負責人稱玩家入店後，先喺風俗孃嘅服侍下戴上VR眼鏡，跟住從畫面中揀選心水VR動畫美少女，然後邊睇片邊享受風俗孃嘅手作服務。風俗孃手上會戴上一條智能手帶，可以與動畫美少女嘅動作同步，而玩家一邊睇VR影片一邊享受風俗孃嘅手藝，呢種將虛擬實境結合真實風俗服務嘅玩法相當新鮮。而呢間風俗店本來喺5月開業，但係至今仍處於籌備中，究竟幾時先至有得玩？就要等官方正式公布喇！
網址：http://karin10vr.com/
風俗地圖網站作為風俗界嘅一分子，自然唔會錯過發掘VR潛力嘅機會，而「MAN-ZOKU VR」就係首個開設VR嘅風俗地圖網站，跟多間位於北海道、東京、神奈川、大阪、福岡等10個地區嘅風俗店合作，推出超過260套VR短片，內容以各間風俗店內嘅在籍風俗孃透過虛擬實境介紹服務，當然唔少得露肉場面，極之養眼。如果玩家對片中風俗孃有興趣嘅話，可以透過片中嘅風俗店官網連結，直接進行預約。不過大家要留意，大部分VR片僅支援手機，另一方面，用手機睇片嘅過程都幾麻煩，事關要先下載應用程式，跟住再掃VR片嘅QR Code，再進行相關設定至得。
網址：http://www.manzoku.or.jp/vr/
撰文：魂