情愛初發現

外國嘅成人小說佳作有好多,但係要睇呢啲外文成人小說,總會有種隔膜嘅感覺,始終都係中文比較有親切感啲。既想睇外國成人小說,又想睇中文版嘅話,咁點算好呢?好彩家陣都有唔少翻譯成中文嘅作品,好似呢本由日本成人小說家如月所著嘅《蜜色認證》,就係呢期嘅推介。現居於日本名古屋嘅如月,雖然自稱不論讀者反應熱烈定冷淡,仍始終不懈地寫作,但實情佢係日本亞馬遜網上商店嘅人氣作家,推出過多本糅合浪漫情懷,及心靈相通愛戀嘅身心靈契合著作,而呢本小說正係集合晒上述元素而成。

故事講述夢想成為寵物美容師嘅女主角大谷瞳,為圓夢而過住喺寵物美容店半工讀嘅生活,期間認識到出名難搞嘅男客人門島零次。兩人接觸過後,卻發現零次嘅性格並非傳聞般難頂,亦因此勾起瞳對佢嘅興趣。正當兩人慢慢熟落起嚟嘅時候,瞳收到奇怪嘅訊息,對方對佢嘅行蹤瞭如指掌,於是搵零次求助,零次決定貼身保護瞳。喺一個夜晚,兩人壓抑唔到嘅慾火,終於打破友誼嘅界限,正當瞳沉醉喺愛情之際,卻發現零次嘅真實身份,以及佢身邊有位美人相伴。站喺感情分岔口嘅瞳,喺感情同慾火嘅交煎下,提唔起拒絕嘅勇氣,而一次又一次踩入慾火嘅禁區中。究竟火熱嘅愛同慾望嘅盡頭,瞳最終會點抉擇呢?

書名:《蜜色認證》

售價:約HK$70

撰文:魂