日本AV界女優眾多，女優們鍾意分黨分派，當然亦有分門別類，例如蘿莉系、熟女系、巨乳系、美尻系等，而澀谷系辣妹屬AV界其中一大勢力。提起澀谷系作品一定要講kira☆kira呢間主打澀谷妹嘅AV廠，今次請來廠方嘅宣傳部負責人kira子為大家講解澀谷妹嘅來歷以及演變！
以前我哋會稱呼壞女孩做飛女，之後就稱之為老泥妹，近年會用MK妹嚟形容。而喺日本，壞女孩形象深入民心嘅多數係澀谷妹，佢哋稱之為「Gal」，此名演變自英文「Girl」。咁點解「Gal」後來會被套用嚟稱呼澀谷妹呢？專門拍攝澀谷系AV作品嘅大廠kira☆kira就搵來宣傳部負責人kira子解釋一下。佢話漫畫家中尊寺幸子喺90年代初嘅作品《Sweet Spot》用「Gal」嚟代表澀谷系，後來慢慢變成澀谷妹嘅統稱。kira子解釋話，澀谷系女孩早於80年代後期出現，後來數目愈來愈多，當時嘅澀谷系興着緊身滑雪裝以凸顯其曲線身材。去到1995年左右，由於安室奈美惠大紅大紫，故澀谷妹學習其時尚打扮及化妝，一身超短裙、厚底靴，仲留長長嘅茶色頭髮、幼眼眉，而黝黑膚色更加成為澀谷妹嘅標誌，日本AV界經典澀谷系女優澀谷愛麗絲就係呢種打扮喇。
喺90年代尾，澀谷妹不斷轉變，其中喺1998年出現咗「山姥辣妹」，呢種辣妹打扮更為誇張，保持住上一代澀谷妹嘅髮形，但喺染髮上唔再用金燦燦嘅金黃色，而係進行脫色程序搞到把頭髮甩色變得暗暗啞啞，至於化妝就同我哋中國國寶掉轉，眼圈就白色，其他部分嘅肌膚就深色，而唇膏亦用上眼圈嘅色調，搞到好似非洲部落人一樣！AV界有唔少山姥辣妹演出，但都係屬於素人性質為主，事關AV迷普遍覺得呢種打扮難以接受。到2000年，澀谷系終於有個由黑轉白嘅現象，點解呢？因為安室奈美惠帶來嘅黝黑膚色熱潮已過，取而代之係濱崎步，而步姐嘅白色肌膚及打扮就成為澀谷妹嘅時尚標誌！呢種時尚仲延續到今時今日，丘咲愛蜜莉、長谷川理穗則屬於呢種澀谷妹，而澀谷系AV亦開始愈拍愈多。
濱崎步對於澀谷妹嘅影響至今日依然存在，而2005年又有另一位女歌手對佢哋影響深遠，呢個就係倖田來未喇！倖田來未歌精舞勁，打扮上更加提高胸部同美腿嘅露出度，令當時嘅澀谷妹同樣作暴露打扮；加上時尚雜誌《小惡魔ageha》創刊，令澀谷妹跟風，將浮誇嘅閃閃發光飾物戴上身。同期澀谷妹由成熟變成蘿莉風格，跟住出現咗不少澀谷媽媽，kira子表示箇中原因當然係班澀谷妹狂野又好「性」，好多都唔小心畀男人搞大咗個肚，繼而年紀輕輕就做咗媽媽。佢仲話近年澀谷系文化開始有倒退現象，以澀谷系文化作主題嘅雜誌亦相繼停刊，原因之一係現時大家都愛好自然環保，女性都以自然裝扮為主，澀谷妹嘅市場當然會縮窄啦！之不過，kira子慶幸喺現時澀谷系AV女優當中，仲有好多撐得起半邊天嘅天后級女優，上屆DMM成人獎嘅優秀女優獎得主AIKA就係其中之一喇！
撰文：賢