卡片黨即係乜嘢？咪就係經常喺酒店房間嘅門罅，或周街派發關於提供色情服務嘅招嫖卡片組織囉！內地有關當局一直對取締呢啲卡片黨不遺餘力，經常組織各類型嘅行動進行圍剿，但係由於呢啲色情卡片黨背後所涉及嘅利益太大關係，故此一直以嚟都係屢禁不絕。另一方面，卡片黨嘅活動模式亦冇以前咁張揚，化整為零嘅佢哋不但以打游擊嘅方式活動，同時派卡片者對上線冇直接聯擊，令打擊變得更加困難。不過正所謂唔怕神嘅對手，最怕豬一樣嘅隊友，武漢有一名男子派招嫖卡片，竟然派到去派出所！喺上個月底，呢位34歲嚟自海南嘅陳男，喺武漢江夏區到網吧及向路邊停泊嘅汽車派發招嫖卡片，點知佢唔知係咪人生路不熟關係，不知不覺派到去江夏藏龍島派出所。呢個時候派出所嘅便衣民警見到陳男，於是跟蹤對方，發現佢派發招嫖卡片後，即時將佢逮捕，而陳男被捕時仍一臉愕然，稱唔知自己派到派出所！據陳男講，佢早前喺手機社交應用程式上識咗個男人，對方稱只要幫佢派卡片，每日可獲得300元人民幣嘅酬勞，於是佢答應對方。被捕當晚，陳男帶咗2,000幾張卡片派發，而警方則喺陳男及其汽車上，搜獲1,600張未派發嘅招嫖卡片。