喺內地房東同舖東若知道租客經營色情場所，卻並無主動向有關方面舉報嘅話，業主係會同樣被檢控。雖然講咗咁多次，而內地傳媒亦多番講述，但係仍然有唔少業主抱住鋌而走險嘅心態，結果咪惹禍上身囉！好似早前深圳龍華區有一位業主，因為知情不報而被行政拘留，據朱姓業主表示，喺去年12月佢將出租屋租畀一位堯姓男子，當時對方未有同朱男解釋，出租屋將用作賣淫地方。及至今年初裝修之後，出租屋以「足浴」為掩飾，查實提供色情服務。經營期間，朱男雖然一方面提醒堯男唔好喺店內進行違法活動，但另一方面則抱住僥倖心態，以為自己係業主，屋內任何違法活動都與佢無關。結果喺今個月19日，警方對該出租屋採取掃蕩行動，將堯男為首嘅賣淫集團等4人、4名涉嫌賣淫女子及3名涉嫌嫖娼男子依法行政拘留，而知情不報嘅朱男則被行政拘留5日。警方表示作為房屋出租人，喺收取房屋出租所帶嚟嘅利益同時，必須履行房屋出租嘅管理責任，除咗要肩負杜絕租客利用出租屋從事不當行業外，更有舉報嘅責任，否則會違反治安管理處罰法第57條嘅規定。