人就係咁矛盾，一邊話英雄救美式嘅劇情老土，一邊卻仍然相當捧場，否則電影同電視劇點解拍咗咁多年，呢類作品仍然長青？如果鍾意睇呢類題材，卻又覺得男主角救完女主角後鹽花場面唔夠多嘅話，呢本翻譯自美國超人氣成人小說作家蘿拉．蕾（Lora Leigh）所著嘅作品《鬼牌情獵》（Wild Card）相信可以滿足到你。蘿拉人氣有幾咁高？佢嘅著作不但屢獲網絡書店亞馬遜評為4.5星以上，而《鬼牌情獵》更被稱為足以令人慾望無限爆發之作。
故事講述喺海豹特種部隊服役嘅特種兵納森，本嚟係一個體貼嘅丈夫，同時亦係一間修車廠嘅老闆，原本佢同老婆薩貝拉過住幸福又甜蜜嘅生活，後嚟被一次秘密行動所粉碎。失手被擒嘅納森被敵人囚禁18個月，期間受盡各種酷刑及不人道對待，以致佢嘅外表及內心都有大改變，變得極為黑暗。雖然佢後嚟逃出生天，但自感改變極大關係，於是要求軍方同佢老婆訛稱自己喺任務中犧牲，並改名諾亞轉到另一精英小組執行任務。老婆薩貝拉18歲同納森結婚，20歲卻得悉丈夫陣亡，經過6年時間先至從痛苦中爬番起身，而佢卻估唔到自己竟然會被新嚟嘅技工諾亞所吸引，事關佢從對方身上，搵到納森嘅影子、氣味以及小動作，勾起佢對亡夫嘅思念。愈嚟愈對諾亞感到好奇嘅佢，久違嘅慾望一發不可收拾，但係佢卻估唔到，原來瞓喺佢身邊嘅諾亞，竟然就係佢丈夫。原來諾亞喺一次行動中，得悉薩貝拉被捲入一宗涉及殺害FBI探員嘅秘密行動中，而兇手正潛伏喺佢嘅修車廠技工之中。為咗保護對方，同時亦因為斬不斷嘅情絲，諾亞決定以新身份喺對方面前出現，不過呢段關係，究竟結局會係點呢？
書名：《鬼牌情獵》（Wild Card）
售價：約HK$110
撰文：魂