好多人都貪新忘舊，女人喺床上亦有類似情況，同新床上對手激戰，假扮高潮嘅比例會較低。另外，有調查發現男人嘅平均勃起長度比兩年前做嘅同類調查長咗，點解嘅？而男人嘅小兄弟長短喺女人心目中係咪咁重要呢？事實上大部分女性都唔太介意！
由細到大長輩都會叫我哋千祈唔好講大話，要做個誠實嘅人，不過大家可能會發覺做人有時又唔使咁老實，必要時都要「假假地」，例如女伴盛裝出席你嘅約會，雖然化妝技巧欠奉，打扮又過於庸俗，當問到你覺得佢今晚靚唔靚嘅時候，一個正常男人都會按住良心話：「真係鬼火咁靚呀！」否則下場慘過落地獄吞火食炭！之但係，女士們又何嘗唔會為咗滿足男人而弄虛作假呢？早前有調查發現68%嘅受訪女性會喺床上假扮高潮；而最近亦有調查發現同類答案，有60%女性同長期伴侶上床時扮高潮，但係同一夜情對象又或者相識不久嘅男士上床時，則只有40%會扮高潮，點解咁厚此薄彼呢？據受訪女性表示，佢哋扮高潮其實同穩定關係有關，希望以高潮反應滿足長期伴侶，令佢對床戰更滿意及更有自信；至於對住新相識嘅男性唔會扮高潮，則係為咗專心感受對方嘅實力如何，亦因為比較不在乎對方嘅感受。
記得以前啱啱出嚟打工嘅時候，少不免聽到好多前輩喺我背後講閒言閒語，又話我呢啲後生仔唔捱得，又話我做嘢手腳慢等等，聽到佢哋咁講我一啲都冇嬲，因為我知道呢個正係新人需要經歷嘅階段，後來我發憤向上，每日都努力工作，終於得到佢哋認同，之後亦成為佢哋嘅同類，對班新人指指點點喇！近年亦聽到好多人表示家陣嘅新生代比我呢一代更嬌生慣養、更加唔捱得，到底係咪真我就唔深究喇，但係最近一個由知名安全套品牌進行嘅調查，就發現千禧年出生嘅新生代男性，喺小弟弟長度方面就比起老一輩「進步」，調查訪問咗3,037位成年男士，當中大部分都係18歲，即刻約喺2000年出生，佢哋嘅小弟弟平均勃起長度為6.1吋，而兩年前一個同類調查當中則為5.2吋，平均長度相差接近1吋咁多，睇嚟呢班後生仔應該都幾有前途喎！
好多男人都為自己嘅小弟弟尺寸而煩惱，成日擔心小弟弟長度不足，會令女伴喺床上唔能夠得到滿足，甚至會被女伴嫌棄。其實床戰只係男女相處其中一個環節，如果你真心對待對方，所謂人心肉造，大部分女性都唔會介意男伴「短小精悍」嘅，亦有好多調查顯示唔少女性滿足於男方嘅床上技巧，多於因為其小弟弟尺寸而滿足。最近，網站Daily Star Online就做咗一個調查，以了解有咩因素會影響到女性失去上床嘅興趣，結果發現有35%女性會因為男方體味太濃而打消床戰慾望，其次就有22%認為男方性格欠佳，例如太傲慢因而唔想同對方上床，而排第三位就係有20％女性認為男方小弟弟太短，第四位有14%會因男方調情技巧欠佳而棄戰，第五位係男方有爛牙。睇完呢個調查結果，各位男士可以放心啦！
撰文：賢