有調查發現，滿足嘅性生活唔單止可以令人更加開心，喺工作方面亦更有效率。男人好緊張自己胯下嘅命根兒長短，最近有調查以了解三個國家嘅男士命根長度。家陣溝女唔一定要傾電話，用手機聊天App一樣方便又快捷，咁有咩方法可以增加溝女成功率呢？
最近見到幾位女同事都面色暗啞，心情煩躁，工作冇乜心機，我師兄就話：「一睇佢哋個樣就知感情生活不暢，性生活不協調啦！」其實性生活愉快對打工仔嘅工作效率又係咪有影響呢？早前美國俄勒岡州立大學商學院就搵來159名已婚打工仔協助研究，監察一下佢哋喺兩星期內嘅性生活狀況，同時跟進埋佢哋每日上班早午晚三個時段嘅工作效率。負責研究嘅Keith Leavitt表示，結果發現打工仔嘅房事次數愈頻密，其工作效率亦愈高，亦發現佢哋更為享受及陶醉於工作當中。Keith Leavitt話性生活滿足可以令人宣洩到來自工作嘅壓力，心情更開朗，工作自然爽手好多。另外，佢表示人總係希望得到平衡，性生活方面如意，亦想喺工作方面一樣咁開心，以達到公私生活平衡嘅狀態，所以性生活同工作之間可以話關係密切。
錢銀可以靠努力工作而有所增長，之但係男士們幾努力都好，有一個地方總係佢哋唔能夠完全控制，就係小弟弟嘅長度喇！不過港男又唔使為自己嘅小弟弟而擔心，因為幾年前一個國際性調查顯示，港男嘅小弟弟平均長度位列亞洲多個國家嘅第10位，勃起時平均長度為４至５吋，猶勝日本同台灣男士，港男認真威番次喇！至於比起其他國家又點呢？最近約會網站Saucy Date發表相關調查嘅結果，不過主要針對英國、澳洲同加拿大三個國家，結果顯示英國男士嘅勃起長度平均為6.89吋，但係結果同實際可能有出入，因為據當地女性提供資料，顯示英男嘅平均長度為6.64吋。喺澳洲亦有相同情況，據澳男提供嘅資料顯示，佢哋嘅平均長度為7.09吋，不過當地女士認為佢哋其實只係得5.58吋。至於加拿大又點呢？加男平均長度為6.84吋，但當地女士就認為佢哋實際上有6.96吋長，睇嚟加拿大男士比較謙虛，冇英澳男咁自大喎。
雖然小弟我自命鍾意寧靜安逸，曾經有意思隱居山林與世隔絕，研究一下琴棋書畫及下田耕作，但係諗諗吓都係做唔到，冇得上網睇鹹相同鹹片，壽命都會短幾年呀！再者，冇手機畀我溝女，真係慘過死！提到用手機聊天程式同女仔「溝通」，唔知大家又在唔在行呢？最近日本網站「Menjoy!」收集咗戀愛心理專家嘅意見，指出男士如果想成功用手機聊天程式溝女，可以試吓將自己下廚嘅菜式照片傳畀心儀女仔，專家話女仔見到食物都會放下戒心兼感到心情暢快，同時可以顯出自己素有生活要求，增加個人魅力，將食物照片傳畀女方就算引唔起佢求教煮法，亦可以挑起食欲，約出嚟食餐飯都容易啲啦！第二個貼士就係切忌傳太長篇嘅文字畀對方，但係太短亦唔適合，太長會令女仔睇嘅時候覺得麻煩，甚至感到壓力，不過太短又會令對方覺得你敷衍回應，大概用十零個字表達意思就最適合。第三個貼士係見到對方「已讀不回」，千祈唔好即刻再追問，隔兩日再溝通較好，否則會畀對方太大壓力。
撰文：賢