戰鬥力不足用前戲搭夠

好多男人都覺得自己嘅持久力唔夠強,怕滿足唔到女伴,但係專家話抽送時間唔使長,只要前戲做足就得喇!日本好興攝影會,當中唔少模特兒試過被龍友提出過分要求,但係為咗錢,惟有犧牲色相。男人對結婚多少都有恐懼,但係有研究顯示已婚男無論喺搵錢方面抑或性方面都比較出色。

前戲一刻

小弟除咗熱愛睇波,亦熱愛踢波,隨年月增長,每次落場之前都會做足30分鐘熱身運動,一來年紀大唔做熱身好容易抽筋,二來做充足熱身至會達到最佳狀態。其實喺床上面亦都係一樣,性心理學專家Lisa Hochberger Sadi表示床上熱身運動,亦即係大家所講嘅前戲,乃係女士們心中最渴望嘅床戰重要部分,佢哋覺得重視前戲顯示出對伴侶尊重。專家仲提出咗3個要點提醒男士們,第一就係調查心態,上床唔一定係「前戲─抽送─後戲」,事實上可以喺抽送期間「分體」再進行愛撫、錫錫等前戲。第二個重點就係捨得花時間,女性一般都需要交歡15至20分鐘至可以達到高潮,而男士們平均只係用2至10分鐘就可以高潮,時間差距甚大,但係就可以用一刻鐘,亦即係15分鐘前戲嚟延長時間以作補足,咁就唔使千方百計增強持久力啦!第三就係開口問,因為要做十幾分鐘前戲其實都幾耐,一定要問吓對方鍾唔鍾意,又或者想你刺激佢邊一個敏感點等等,一來唔會悶場,二來亦顯示出你一心想令佢開心。

「色」事寧人

日本有好多攝影會,當中除咗由知名AV女優或者水着女優做模特兒之外,亦有唔少係邀請坊間嘅妙齡少女做模特兒。早前,日本內閣府就進行一項調查,除咗發現唔少女仔接受過相關邀請,亦顯示出拍攝期間一班模特兒被提出過不道德要求。調查透過互聯網進行,訪問咗20,000名年齡介乎15至39歲嘅女性,當中有2,575表示被邀請過做攝影模特兒,而實質參與過拍攝嘅則有197人,當中更加有32%未滿18歲。至於佢哋喺拍攝嘅時候會做乜呢?最多女仔被要求拍水着寫真,佔人數58.5%,亦有35.8%被要求拍全裸照,被要求拍AV嘅亦有22.6%。人哋提出要求啫,佢哋又會唔會答應呢?197人當中有32.1%表示曾答應對方嘅要求,主要原因係為咗搵更多錢,其次係誤以為合約中包括咗呢種拍攝方法,第三就係唔想麻煩,故不情不願咁犧牲色相。

已婚男更有性福

今年雙春兼閨月,好多老人家都話係嫁娶好時機,好多長輩都叫我快啲拉埋天窗。不過,小弟家陣仲係單身人士,邊有咁快搵到對象拍拖,仲要喺今年內結婚就真係諗都唔敢諗,更何況小弟本身唔想結婚,步入戀愛嘅墳墓當中。相信好多男人都同小弟一樣,但係有研究顯示已婚男士喺好多方面都比未婚者優勝。研究發現已婚男當中有一半極度滿足於性生活,相比之下,未婚而有伴侶嘅男人以及單身男分別只有39%同36%覺得滿足。另外,已婚男喺搵錢方面亦比未婚人士賺多1成至4成。咁亦唔難理解,有咗頭家點都要搏命搵錢養家,唔通餓死老婆瘟臭屋咩!喺壽命方面,已婚男同樣比未婚者更長壽,平均長命10年。睇嚟小弟真係要認真考慮搵個伴組織家庭喇。

撰文:賢