成日話女人心海底針，其實男人嘅心理亦好複雜，要求女伴有樣有身材，仲要喺適當嘅時候溫柔體貼，去滾嘅時候就咪黐埋嚟，你話係咪好複雜先？當然，如果女友好似啱啱推出處女寫真集嘅外崎梨香，話就唔係咁講，事關睇少佢一陣都驚佢畀人撬走咗呀！
邊種女仔最得男人歡心？就係純度極高嘅美少女！嚟自日本樂壇偶像女團「Doll Elements」成員之一嘅外崎梨香，絕對係代表之一。喺青森縣出生嘅佢，不但唱得又跳得，講到最為吸引之處，莫過於佢純真兼活潑可愛嘅形象，加上養眼嘅美乳，真係誘人到爆。雖然佢先後為唔少雜誌拍過寫真，但係講到佢首本個人寫真集，卻係等到大家頸長都未等到。
幸好，大家終於唔使等喇！最近阿妹推出咗處女個人寫真集《外崎梨香First寫真集 Rikapyon》，當中佢除咗展現清純氣質外，仲以大量性感得嚟又健康嘅造型示人，好似毛巾Look、婚紗Look等，當然唔少得比堅尼Look啦！據知寫真集名原來有段古，原來「Rikapyon」不但係外崎梨香嘅花名，更係佢屋企一隻兔仔嘅名字嚟添呀！
書名：《外崎梨香First寫真集 Rikapyon》
售價：約HK$198
坊間有唔少性學書籍讓男人明白女人嘅心理同生理需要，相反有關男士性心理嘅書籍卻唔多見。而呢本由台灣兩性專家沈子棨所著嘅《性愛的科學》中，不但對女性性問題有深入剖析，更深入解構男性嘅生理同心理層面，不論男女讀者都能透過書中內容，明白兩性性關係中嘅深層需要。沈子棨不但係性福導師、性治療師、性諮詢師等，更係美國執業性學家，而佢協助過嘅成功個案近千宗。書中內容共分為兩個部分，分別係「男人的性愛」同「女人的性愛」，每個部分當中又分為「外表」、「肉體」、「性器」同「內心」4個章節。透過從內到外嘅分析，加上豐富實際案例佐證，令讀者可以理解到喺兩性相處嘅時候，容易面對嘅各種性愛疑惑，例如女性以為裸體先至係性感，其實對男人嚟講，若隱若現才最性感。以上種種男女疑問，透過書中豐富嘅內容，同埋作者深入嘅解說，都能搵到參考嘅答案。
書名：《性愛的科學》
售價：約HK$80
背妻偷食已經夠賤，若然背住大肚妻偷食更稱得上係世紀賤男，可惜男人總係犯同樣嘅錯！唔想畀老婆「唔方便」做藉口令自己出軌，先睇睇《The Ultimate Guide to Sex Through Pregnancy and Motherhood》呢本性書，話就話專門針對孕婦而分享嘅「懷孕兩性床上技巧」，查實應該畀男人睇，讓男人先了解老婆嘅生理狀態，仲有喺懷孕期間嘅安全性行為應該要注意事項，咪再道聽塗說有喜唔掂得、唔搞得，甚至連提都唔得呢啲無稽之談。呢本「指南」由性學家Madison Young以過來人身份分享，加上多年來研討會點滴所得，非常有教育意義，仲會喺女性角度分享如何喺懷孕期間保持性慾、自信及魅力，當然唔少得懷胎十月嘅床上安全招式，全書288頁，英文簡單易明，你話男士睇完完全明白女人之苦，仲邊有心情去偷食吖！
書名：《The Ultimate Guide to Sex Through Pregnancy and Motherhood》
售價：約HK$148
撰文：魂、祖