呢期內地及台灣嘅夜場新聞，都係圍繞住一個貪字。前者有網約司機為貪報酬而犯法，後者則因為貪搵多啲，結果被色情業者壓迫。至於日本風俗業方面，則夠晒特別，因為有風俗店竟然將風俗孃嘅頭像相片變晒做漫畫，咁叫班玩家點揀呢？
乜嘢叫做偽基站呢？即係透過非法無線電通訊裝置，將訊息發送到附近使用SIM卡嘅通訊器材，讓對方接受推銷訊息，而喺呢個過程中，SIM卡通訊器材係冇辦法連接到正常嘅通訊網絡上。雖然咁做係違法，但內地有色情業者卻鍾意將有關裝置設喺車輛上，以流動偽基站避過有關方面查獲，而且相對派發色情卡片，效果更高。話說早前北京東城檢察院對一位馬姓網約車司機提出起訴，原因係佢將車輛變成流動偽基站。馬男喺今年7月某晚接載一個男乘客，對方提出每日600元人民幣報酬，要求馬男畀佢喺車上安裝一個發送招嫖短訊嘅裝置。馬男覺得好搵不但答應，仲搵埋同樣做網約司機嘅王男，喺車上裝番一個，結果呢個裝置先後共影響超過30,000名手機用戶！影響咁大梗係引嚟警方極大關注，結果王男先行落網，而馬男喺9月自行到公安機關自首，至於提供裝置嘅男子，卻要進一步嘅調查先至搵到。
由於台灣對泰國免簽證關係，故此吸引一啲從事色情行業嘅泰國女郎，藉此到台灣嘅色情場所搵錢。不過有啲色情業界人士，卻以月底出糧及恐嚇手段，威逼呢班泰國女郎唔敢逃走，做法真係過分！話說台北大同分局警方喺早於轄區嘅一幢出租套房大樓內，破獲一個色情應召站，並喺站內逮捕台籍及中國籍賣淫女郎各一名，泰國籍女郎3名及3名玩家。3名泰女郎被捕後對警方訴苦，其中一位表示佢一落機就被帶到應召站工作，前前後後做咗30日，先後接客近百人，每次可獲1,000元新台幣（約250港元）嘅報酬。雖然至今賺到10萬元新台幣（約24,000港元），但應召站月底先至找數等佢哋唔敢逃走。另一位泰女郎則稱，佢一落機證件就被扣押，對方恐嚇佢要接夠130個客人先至可以走。縱然佢哋遇人不淑，刑責仍唔可以避免，被捕眾人被判罰款6,000元新台幣（約1,250港元），而4位外籍女郎隨後被送往台灣移民署收容安置。
日本漫畫多粉絲，因此部分風俗店搵漫畫家幫手，將店內嘅各種服務化成漫畫故事，等玩家覺得有趣嘅同時，又容易明白服務內容。不過任憑漫畫嘅魅力有幾大，有啲嘢真係唔能夠漫畫化，就係風俗孃嘅頭像相。位於東京涉谷嘅護理制服風俗店「Don't 齒科衞生士」，睇個名就知道店內嘅風俗孃以牙科護士造型登場，而對於習慣先喺官網睇風俗孃嘅玉照再入店嘅玩家嚟講，梗係會上網睇吓個樣先。點知呢間店夠晒創新，竟然將風俗孃變晒做漫畫公仔！就算係素描畫都未必同真人百分之百相似，更何況係漫畫化後嘅人樣，最重要係呢啲漫畫畫得勁可愛，點睇都好難聯想到真人個樣囉！唔好勞嘈住，風俗店係有解釋嘅，據稱佢哋呢種做法嘅其中一個目的係唔想呃人，佢哋認為風俗店嘅風俗孃相片都經過修改，改到同真人一啲都唔似認真無謂，既然係咁佢哋索性用漫畫相取替。另一個原因係更能勾起玩家嘅好奇心，加上佢哋喺風俗孃個人介紹下嘅「精心」形容，必定能夠引起玩家無限嘅聯想咁話。呢啲解釋，大家又接唔接受呢？
撰文：魂