呵欠打多啲命根都硬啲？

充分吸氣

十個有九個男人都希望自己性能力強啲，咁先可以凸顯男性雄風，喺床上令女伴高潮迭起、貼貼服服。為咗達到呢個目的，好多男人都會選擇進補，食營養補充品、野味，甚至係補藥，當然亦有人透過運動增強體質啦！早前，英國新聞網站Daily Star就有一篇文章講述咗好多增強性能力嘅方法，其中一個就係多做運動，因為運動可以增強血液循環以及血液嘅帶氧量，當然會增加男士們嘅命根硬朗程度啦！文章特別指出運動仲可以收身從而預防糖尿病，呢個病症會減低由下陰傳到大腦嘅刺激感覺，刺激感下降命根都冇咁容易硬起來啦！另外，打呵欠亦有助增加命根硬朗度，因為打呵欠同勃起都受到一氧化氮影響，打多啲呵欠意味體內一氧化氮濃度上升，有助勃起時硬度增加。文章亦指出早前美國德克薩斯大學研究得出，每日飲兩至三杯咖啡嘅人比唔飲咖啡嘅人，患上勃起障礙嘅機會更低，因為咖啡因可以提升體內代謝率以及促進血液循環。文章仲有一個方法，但係大家應該唔會嘗試，就係結紮喇！因為有專家指出心理因素對命根硬朗度有莫大影響，男人結紮咗就唔會擔心令女方懷孕，冇咗心理負擔，硬度同表現都會得以提升喎！

腳毛咪搞

我偶像正牌鐵金剛辛康納利後生嘅時候，除咗風流瀟灑、有型有款之外，最令女仔着迷嘅地方正係體毛濃密，特別係心口相當多毛，不知幾多女仔大讚佢性感又有男人味。不過，到今時今日就有唔少女仔表示唔係咁鍾意體毛濃密嘅男仔。外國女性健康網站「Women’s Health」早前透過網上問卷形式，訪問咗多名女性，以了解佢哋對於男人嘅腳毛有咩睇法。受訪女性當中有49.3%表示唔鍾意畀男人嘅腳毛掂到，28.5%則表示佢哋雖然唔鍾意男人「光管腳」，但係亦希望佢哋會修剪一下腳毛。另外亦有22.2%女性話鍾意男人擁有一對表面光滑嘅雙腳！而早前《心理學雜誌》指出有研究顯示有同情心、愛做善事嘅男性喺女性心目中特別有吸引力，大家不妨多捐出善款，亦可以助養兒童，做到善事又可以提升喺女仔心中嘅形象，一舉兩得呀！

自動找數

近期小弟又再出手約女神出街，終於都畀我乘其芳心寂寞嘅時候一擊即中，成功約佢出街食晚飯喇！之不過，小弟已經冇同女仔出街多年，又怕同女神食飯時講錯說話、做錯事，最驚就係選擇嘅餐廳唔啱佢胃口，當晚晚飯後如果唔可以「得米」，好可能要等好耐先至再有機會喎！點算呢？如果大家亦有類似小弟嘅煩惱，唔使怕！早前一個日本網站訪問咗832名年齡介乎20至59歲嘅女性，睇吓第一次約會時有咩會令佢哋產生就算即晚上床亦冇問題嘅衝擊。排第一嘅係男方自動自覺畀錢喇！37.3%女性認為咁做可以顯示出對方夠大方有風度，亦對女方有一定重視程度。其次有37%受訪女性表示男方食飯嘅時候講究禮儀，咁又係，食飯食到發出聲音、搞到四圍污糟晒都會令女仔覺得男方粗魯，喺女仔心中都唔會有好印象啦！第三就係服務生嘅態度喇！因為女仔覺得服務生態度欠佳係男方選擇咗錯誤餐廳，會將不滿完全投射到男方身上。第四係有好多嘢食，好多女仔表面唔大食，但實際上好為食，餐枱擺出花多眼亂嘅菜式每每令佢哋心花怒放，開心嘅同時亦會放下戒心。第五就係男方事前識得去餐廳訂位，呢一點亦反映出男方對女方嘅重視程度，同時亦可以睇得出男方肯花心思有情趣。

撰文：賢