好多研究都話性生活愉快，對身心健康大有裨益，最近仲有研究發現，多達到高潮，壽命都會較長。近期日本興起「比村奇石」熱潮，即係用巨乳托住手機，呢股熱潮仲吹到去歐美添！除咗男人，女人都會出軌，咁邊種職業女性最容易出軌呢？一陣就話畀大家知。
前年有調查發現，香港人嘅平均壽命超越咗日本，名列全球平均壽命最長人口城市。小弟就唔係好明，香港空氣質素又唔係咁好，生活又咁忙碌，「返工咁多嘢做，想做死人咩！」呢句說話相信大家差不多每日都聽得到。不過，細心一諗可以發覺到香港人之所以長壽，好可能同生活因素有關！好多香港人做死一世都係為咗供樓，自己供完都仲要諗住幫下一代畀首期，甚至係幫手供埋一份，所謂養兒一百歲，長憂九十九，見阿仔層樓又未供完，自己又點捨得去呢！香港人長壽而淒涼，但係意大利人就長壽而開心，最近羅馬大學和聖地牙哥醫學院花咗半年時間，到訪意大利一條名為Acciaroli嘅小村莊，研究點解呢個村莊嘅人口大部分都咁長壽，更加有超過十分之一人口年過百歲。有份研究嘅心臟專家Alan Maisel就話當地人長壽嘅原因好大機會係同經常做愛有關，佢補充話性愛可以令人更年輕、心情更愉快，仲可以預防心臟病以及認知障礙症。另外，Alan Maisel亦表示當地人每日都用迷迭香作為菜式調味料以及花茶，而迷迭香有改善腦功能以及體質嘅作用，相信亦係當地人長壽嘅原因之一。
進入網絡時代，一有得意、有趣嘅事情大家都會瘋狂將消息互傳，近年更加興起二次創作及倣效潮啦！早前日本騎呢男歌手PIKO太郎嘅一首《PPAP》爆紅，引起好多網民爭相倣效喇！近年，日本人就唔再玩呢首歌，而係玩一招胸部托手機，此動作叫做「比村奇石」！比村奇石其實係一位漫畫家，其作品以大波妹為主，作品當中曾經出現一個大波女仔以豐滿上圍托住部手機，喺備受熱議之後，好多上圍豐滿嘅日本女仔都有樣學樣將照片上載同人分享，之後一傳十， 十傳百，瞬間引爆呢股「比村奇石」熱潮！大家可以從好多日本寫真女郎以及AV女優嘅社交網睇到佢哋表演「比村奇石」嘅自拍照。講到個胸大到可以托起手機，西洋美女當然唔會輸畀日本妹啦！繼早前嘅波底夾筆熱潮，「比村奇石」熱潮已吹到去歐美，仲演變成為類似前年冰桶挑戰嘅「比村奇石」挑戰，好多西洋巨乳美女都樂於喺網上「騷哥利」。
小弟近十年內結識過唔少心儀對象，不過大部分都溝唔到，雖然主要原因係小弟又肥又矮又冇錢，但係亦有小弟了解完對方之後，唔想再同佢發展落去嘅例子，其共通點都係對方花心而不實在，同我一齊嘅時候亦會約其他男仔出街，原因係對方從事保險行業嘅關係，每日會與不同人士接觸，我亦發現佢有意試圖喺客戶當中搵個富家子弟做長期飯票，長痛不如短痛，趁雙方未發展得太深入嘅時候斬纜！咁唔知仲有冇其他行業嘅女仔容易出軌呢？最近一個約會網站進行過調查，以了解一下出軌嘅女性當中以邊個職業為主。網站訪問咗5,000位女性，結果發現最容易出軌嘅行業為金融界，其次係航空界，第三係醫護界，第四為商業界，第五為運動界。身處呢幾個行業嘅男士就唔好開心得太早，因為調查亦顯示85%出軌嘅女性係唔會與同事亂搞關係，亦即係話佢哋嘅出軌行為對外而不對內嘅。
撰文：賢