生活有節奏，床上運動亦應該有節奏，有調查顯示女性比較鍾意「動作」有節奏嘅男人。鬍鬚係男性嘅身體特徵之一，好多男人都喜歡留鬚增加男人味，咁女仔對於男人留鬚又點睇呢？女人出軌有不同理由，有調查發現價值觀不同係最大原因。
小弟係一條溝唔到女嘅可憐蟲，其貌不揚固然係一大原因，社交圈子狹窄亦係其中一個因素，於是身邊嘅朋友都提議我參加各類興趣班溝多啲女。不過，咁多興趣班學邊樣好呢？烹飪？小弟已經廚藝高超唔使學啦！水電？我怕污糟喎！諗諗吓都係去學樂器啦！女仔一向都覺得識玩音樂嘅男人比較吸引，有調查仲顯示男人喺床上有節奏感，可以增加女伴嘅興奮度。英國新聞網站Daily Star早前搵來唔少成年女性訪問，問吓佢哋覺得出色嘅床上伴侶需要有咩條件，其中一個就係床上動作有節奏，另外一個條件就係動作流暢，佢哋話對方有節奏感又流暢嘅「一出一入」，令佢哋覺得大家都喺度享受性愛，感覺相當浪漫，唔係單方面畀男人發洩喎。第三個條件就係錫得溫柔，有受訪女性表示遇到打車輪時只係識得伸到條脷長一長，好似想伸埋入喉嚨一樣嘅男人，咁錫法動作較為粗暴，女人最怕呢種唔識憐香惜玉嘅男人！第四個條件就係有傾有講，由足夠溝通了解到大家想要同想做，玩起上嚟就有默契好多啦！
每次見到班外國男星留一臉鬍鬚，小弟都不知幾咁羨慕佢哋嘅鬍鬚生得咁濃密，又修剪得咁有型有款，男人味出晒嚟，唔怪得班女仔見到佢哋，個個都心醉神迷啦！只可惜，小弟我天生鬍鬚唔濃密，想學都學唔到！話時話，女仔又係咪真係覺得留鬚嘅男人特別有男人味同吸引力呢？《進化生物學雜誌》早前訪問咗8,520名成年女性，了解佢哋對男人留鬍鬚有咩睇法，結果發現如果女性只係會同對方發生一夜情或短暫關係的話，就會偏向選擇留有鬚根嘅男人，至於想發展長久關係就會選擇留有鬍鬚嘅男人。調查負責人解釋話，當中嘅原因同原始時代有關，因為鬍鬚長喺當時代表心智較為成熟兼具有智慧，生存能力亦高，女人會覺得佢哋較容易養活、保護自己以及下一代，而呢一個諗法嚟到現代亦改變不大。
「千金易得，知己難求」一直都係小弟嘅信念之一，所以每次成功搵到女友我都會好好珍惜，只係女友大致上都唔會珍惜我，是以，小弟向來都唔係咁鍾意其他人有一腳踏兩船嘅行為，一來應該珍惜對方，二來我呢類唔多吸引嘅單身漢已經好難溝到女嘛！你哋仲一腳踏兩船嚟減低「貨源」供應，係咪想斷我哋「米路」先！喂！斷人衣食猶如殺人父母，小心有報應呀！講到報應，除咗男人會背女友偷食，女仔亦都會，咁佢哋偷食又有咩理由呢？
日本兩性網站「Menjoys !」早前訪問咗9,337位年齡介乎20至40歲嘅女性，發現佢哋偷食嘅最大原因係同男伴價值觀不同，佢哋話經常因此而鬧不和，呢個時候遇到一個理念相同嘅男仔就好容易將個心傾向第三者。第二個原因係對方先偷食，女仔則以眼還眼，以偷食作報復手段。第三個原因則係經濟問題，因為男友唔肯花錢喺自己身上，故透過偷食從第三者身上尋找物質上嘅滿足。
撰文：賢