不少人覺得日本成人漫畫係一個微不足道嘅市場，事實日本成漫嘅潛力不僅大，仲有唔少人氣成人漫畫家，鳴子花春就係其中一位。佢嘅地位有幾高？單憑佢嘅成人漫畫作品，亦係暫時唯一一本成漫單行本《少女MATERIAL》，銷量過百萬冊就可想而知。
早喺2000年開始活躍於漫畫同人界嘅鳴子花春，不但憑住出色嘅畫工而廣為圈內人士認識，其筆下少女角色嘅造型，除咗充滿青春味道外，性格更具層次，因而令佢所創作嘅故事扣人心弦。喺呢段時期，佢除咗創作一般主流漫畫外，更有不少成人漫畫作品。
2002年佢首次喺人氣成人漫畫月刊《COMIC快樂天》，發表首個單元《Forehead》，純愛情慾故事唔單止令佢一炮而紅，仲獲得為月刊繪畫封面嘅機會，同時開始以呢本月刊作為成漫發表基地。喺創作成人漫畫嘅同時，2005年佢發表人氣少年漫畫《神樣中學生》，成功令佢喺主流漫畫界打響名堂，佢曾經刊載過成人漫畫嘅《COMIC快樂天》某幾期更被熱炒。
雖然水漲船高，但佢仍然冇放棄創作成人漫畫，及至2008年6月終於推出成漫生涯以嚟，首本成人漫畫單行本《少女MATERIAL》。漫畫甫推出即被搶購一空，更經過多次再版。到2015年2月，呢本佢人生嘅唯一成漫單行本，總銷量不但超過100萬冊，更有指佢憑住呢本作品獲得高達1億3千萬日圓（約988萬港元）版稅！期間喺2013年佢為人氣動畫《翠星上的加爾岡緹亞》進行原案角色設計，令佢嘅知名度再一次提升。
作為成漫代表作，日本漫畫評論界稱《少女MATERIAL》為超高質作品，不論人物設計、肉體質感、構圖劇情，都係難得一見嘅佳作。單行本收錄咗佢喺成人漫畫月刊《COMIC快樂天》發表過嘅11個單元故事，當中包括《2/4》、《2/4 Continuation》、《Forehead》、《紅水》、《舞蹈摩天輪》、《炒蛋》、《U.F.O.》、《向明日的我問好》、《藏》前及後篇同埋《山岬》。當中最具人氣嘅單元故事，則要數《舞蹈摩天輪》同《炒蛋》。
《舞蹈摩天輪》故事比較曲折，傳說有個失戀摩天輪，但凡戀人一齊坐過上去就會分手。不過小弘偏唔信邪，堅持同美加一齊坐摩天輪。其實喺呢個摩天輪上，住咗千金小姐同管家兩個幽靈，佢哋專門拆散處於倦怠期嘅情侶。正當小弘想同美加坐上去之際，千金小姐將小弘吸入吊艙中，而莫名其妙嘅小弘，卻見另一吊艙中嘅美加，正同管家肉搏起嚟。千金小姐話畀小弘知，喺美加眼中，小弘正在同自己肉搏中。呢個時候千金小姐答應畀個機會小弘，如果佢唔能夠喺限時之內去到美加所在嘅吊艙，兩人嘅情侶關係就會告吹。問題係仲嚟得切嗎？
漫畫名稱：《少女MATERIAL》
作者：鳴子花春
出版：WANI MAGAZINE
頁數：157頁
撰文：魂