加山麗子純到入屋

鄰家氣質

喺1956年4月2日出生於北海道函館市嘅加山麗子，細細個就遷居到茨城縣，並且喺當地成長同讀書。及至佢喺茨城縣立日立第二高等學校畢業後，個性大膽嘅佢，決定投身演藝界，到東京進行演藝研修，憑住清純可人嘅形象，好快就獲得演出機會。喺1977年佢被日活株式會社睇中，邀請參演由著名日活導演西村昭五郎執導嘅經典色情電影《肉體之門》。對於一心喺演藝界發展，性格特立獨行嘅佢嚟講，演出色情電影並冇壓力，對於電影公司嘅要求，爽快答應。由於當時嘅粉紅電影界中，並唔係有太多純情系嘅青春女優，故此佢嘅登場隨即引嚟極大回響。隨住人氣飆升，同年佢又演出另一套粉紅電影《新女囚天蠍座 特殊房X》，同樣叫好叫座。不過講到佢嘅情慾代表作，卻要數佢喺翌年演出嘅《性愛關係》，透過呢套電影令更多人認識到佢唔單止擁有鄰家女孩嘅純情魅力，而且仲有相當嘅演技，成功轉型為實力派女優。

多棲發展

對於一位喺色情電影界中冒起嘅新星嚟講，理論上應該演出更多作品，從而奠定自己嘅地位。不過佢卻冇咁做，反而積極向電視劇界發展。自1979年開始，佢先後演出多套電視劇，當中包括《西遊記》、《同心部屋御用帳 江戶的旋風IV》、《日本名作怪談劇場》等，而喺呢段時間佢冇拍任何電影。及至1982年，佢演出色情電影告別作《制霸》後，更係專心演出電視劇。點解佢咁享受拍電視劇呢？理由好簡單，並非因為電視劇冇情慾場面，而係因為電視劇畀到佢更大嘅演技發揮空間。另一方面，獲得電視劇迷嘅支持，亦係令佢決心離開粉紅電影嘅原因。莫講話當年，現今由艷星轉為電視劇演員，仍難洗脫艷星嘅身份，只係佢卻例外，因為佢純情嘅形象早就深入民心，加上佢對演出嘅執着，更令唔少電視劇迷接受。不過佢嘅事業並非僅得影視兩界，原來早喺1978年佢已經進軍樂壇，推出首張音樂專輯《幽怨花》，雖然呢張專輯並未獲得太大回響，但佢仍然冇氣餒，及至1983年推出第二張個人專輯《勿忘草哀歌》。經過多年鍛煉，令呢張專輯獲得大家認同，至今仍被日本樂壇視為出色嘅作品。

撰文：魂