男人無時無刻都希望自己嘅性能力提高，之不過，每日卻做緊損害精子同性趣嘅行為，就係玩手機！家陣好多人都會用手機Send訊息嚟表達愛意，但係外國大部分女仔都覺得咁樣唔夠真誠。不論賭錢定係溝女，相信冇人想食白果收場，咁點樣可以增加成功溝到女嘅機會呢？
今時今日，智能手機已經成為我哋生活中不可或缺嘅部分，好多人如我每朝早一起身都會先睇一睇部手機，檢查一下有冇朋友喺昨夜午夜夢迴期間傳來訊息，之後不論喺搭車、食飯，甚至係上班嘅時候，都會頻頻咁拎部手機嚟玩。早前英國同美國有電訊商統計過，指出英美人士每日除咗睡眠之外，平均會用上接近三分之一時間使用手機上網，平均每日會使用手機50次之多！之不過，有專家表示男士頻密使用智能手機會對性生活構成負面影響。唔係啩？專家話早有研究顯示如果將手機放得太近下陰，會令男士嘅精子數量下降，另一方面太依賴使用手機，亦會對記憶力、工作效率、情緒有影響，間接造成性趣下降，大家話係咪影響性生活先？所以大家唔好再無時無刻咁掛住玩手機喇！
所謂上山尋虎易，開口問人難，出街唔識路，有時都唔係咁好意思開口問人，更何況係同女仔親口表白呢！以前向女仔表白會寫情信，今時今日，相信唔少人都會用手機聊天程式向意中人表白，成為拖友之後亦會互傳訊息表愛意，每日早午晚傳個短訊畀對方，窩心又方便！之不過，外國有調查就使用手機聊天程式溝女呢個問題，訪問咗過百名成名女仔，發覺原來佢哋其實唔係咁鍾意男方咁樣做，只有15%受訪女仔鍾意透過訊息嚟感受對方嘅愛意，但係訊息通常都係用字講究，且睇得出花過心機。至於另外嘅85%嘅女仔就表示，希望男方可以多同佢哋面對面又或者直接通電話講情話，因為佢哋覺得從螢幕睇文字訊息，始終唔夠親口講咁真心真意，大家識做啦！
早前小弟出街見到街上遊人一雙一對，心入面不禁泛起一陣又一陣嘅思潮激盪，雙眼更加不禁流下滾滾淚珠來！口中不禁大叫：「點解這些機會不屬於我！」於是我發誓，下年一定要搵到女朋友！為咗達到目的，小弟四圍搵目標人物之外，仲花唔少時間探求溝女技巧，又畀我搵到兩個增加表白成功率嘅重點，家陣就同大家一齊分享，希望光棍如你如我都可以縱橫情場，唔使再做溝唔到女嘅可憐蟲！第一點係運用「單純接觸原理」，盡量增加見面次數，即使只係見一陣都好，將見面次數漸漸增加，就可以令對方不期然對你產生正面情感！就算地點、時間不合，亦可以多用手機傳訊息畀對方，拉近大家嘅距離。第二點叫做「好意的報酬」，喺約會嘅時候多稱讚對方，例如話「我好鍾意你個髮型」、「個手袋好靚好襯你」等等，多向對方表達好感同好意，向對方表白嘅時候佢都唔好意思直接請你食檸檬啦！
撰文：賢