「搞嘢」、「曳曳」、「執劑」、「爆房」甚至「啪啪啪」都係時下形容性行為嘅代名詞，喺公眾場合要用到「扑嘢」嚟形容，咁確實係粗俗咗啲嘅。但又唔怪得佢噃，如果佢唔夠粗，又點會忽然全城關注年輕人連做愛空間都冇呢？單係講扑嘢咁興奮，巴打又知唔知全球性愛事件嘅紀錄呢？
當你仲回味上次搞嘢搞咗5分鐘喺度沾沾自喜時，那邊廂日本男優川本英雄經已用「鐘頭」計，寫下人類史上最長持久力及連續做愛時間嘅世界紀錄喇！話說喺2014年日本AV公司SOD搞咗個由三對AV男女優組合，挑戰連續做愛最長時間世界紀錄，比賽規則係過程中可以休戰，但若然男方「變軟」或「走火」都會踢出局，最終男優川本英雄及女優新垣聖那以連續做愛10小時，刷新健力士世界紀錄。當時官方仲喺Twitter作文字直播以示冇造假添！坦白講，咁漫長嘅「性戰」睇怕點都係折磨多過享受啦，難怪「英雄哥」成為日本男人心目中嘅英雄，事關冇人敢挑戰！
數到全球最多性伴侶嘅男人，細佬只諗起60年代威震NBA界嘅名宿張伯倫，佢喺54歲時推出自傳自爆從15歲開始共與2萬名女人上過床，即平均每日同1.14個女人搞嘢，雖然「水分」好高，但話晒係名人加上陳年往事，佢講咪信囉！不過點勁都唔及攞咗世界紀錄嘅美國脫星Lisa Sparxxx，事關喺2004年，阿妹於24小時內連續同919名男性上床，平均一分鐘一個，到今日都未有人破紀錄呀！雖然話十幾年前嘅事，但40歲嘅Lisa依然有心有力，繼續喺脫星界打滾！
唔好意思，又係日本人奪金，又係AV公司SOD嘅主意，舊年大會搵嚟250位嫩男及250位嫩女，事前幫佢哋分組配對，然後將呢班志願人士安排喺倉庫內同一時間「啪啪啪」，成功創造一項新的世界紀錄，現場更有攝影師將「盛況」拍低，製成DVD發售，有圖有相有真相呀！
美國Jonah Falcon你都唔識？證明你唔單止無睇成人新聞，就連國際大事都漠不關心，呢位大名鼎鼎嘅正係世界現存最長陰莖紀錄保持者，人稱「J神」，勃起時長達34.3cm，靜止狀態都有23cm，即係長過成年人前臂呀！現年43歲，身高得175cm嘅Jonah Falcon接受傳媒訪問時表示，多年來入境被懷疑藏有「可疑物品」要接受X光檢查及搜身已習以為常，但最煩都係不斷收到四仔廠重金禮聘佢「下海」，不過Jonah都一一拒絕，唔係佢扮清高，據「J神」自爆話25歲前非常濫交，可以同無限量脫星執劑兼有錢收當然係夢想，無奈喺鏡頭前總係抬唔起頭做人囉！
有啲獎唔攞好過，好似「最淫蕩大學生」獎，冠軍得主係芳齡23歲，拉脫維亞出生，喺英國University of Exeter修讀電腦科學系嘅Elina Desaine，咪睇佢外表咁清純，查實佢一星期有四晚夜蒲，每次都有斬穫，砌完再返夜場搵食，阿妹話最勁一晚啅三件，仲會為每位男士床上表現評分。身邊好友都知佢「交友廣闊」，當睇到交友網站Shag at Uni有淫蕩學生選舉，即刻叫Elina Desaine參加，而阿妹亦不負眾望，奪得冠軍。
先旨聲明，本人係非常尊重性工作者，之但係年屆70歲嘅妓女，仲要係雙飛，Twins喎！問你點招架先？呢對荷蘭孖女姊妹花Louise Fokkens及Martine Fokkens，喺阿姆斯特丹紅燈區做妓女無人不識，一齊企街，一齊招呼嫖客，一做50年，本身經已係一個景點，最後喺2013年70歲嗰年退下火線，埋單計數先後同355,000個人發生過關係，好多人會問究竟姊妹花有乜秘技迷倒嫖客，細佬唔知，但有位導演叫Gabrielle Provaas好「賞色」佢哋，將姊妹花嘅故事拍成紀錄片《Meet the Fokkens》，佢哋仲會大爆雙飛秘技添！
撰文：祖