男人都知道想令女方喺床上得到無比快慰，除咗靠抽送，亦可以運用舌技同指技，有調查顯示女仔相當接受男士嘅手指頭。好多男人都不修邊幅，但係對頭髮相當在意，怕頭髮稀疏會影會吸引力，不過好多英美女仔都唔介意噃。女人結婚後應該好好照顧家庭，日本卻有調查顯示當地已婚女性喜歡參加聯誼活動，更加將婚外情視作等閒。
大部分男人喺床上唔多願意花時間做前戲，只顧埋牙瘋狂抽送，往往令女方感到不滿。有唔少調查顯示，女仔喺前戲當中得到快感，多於喺抽送時獲得快感，早前美國有一個與床上行為有關嘅調查，結果有53%受訪女性表示靠男方抽送係得唔到快感。調查亦顯示，76%女性喺交歡期間會發揮演技扮到相當興奮，甚至假扮高潮，原因除咗為令男方感到滿足，亦因為女方覺得自己反應不足會令對方感到不安，於是「演好場戲」。我都知道女方可能為咗令男方滿意而好辛苦咁做戲，但係我又真係想令女方開心，令佢得到快感又可以點呢？受訪女性當中有過半數表示享受男方指技嘅時候最容易得到快感，過程當中亦發現男方表現滿足！咁又係，男人見到自己嘅指技咁厲害，當然滿足啦！
身邊一位兄弟每次遇到困難時，總會話：「使乜驚呀！有頭髮就有辦法啦！」老實講，頭髮對我哋男人好重要，因為女仔都唔鍾意頭髮稀疏嘅男人。之不過，喺英美就唔同講法喇！早前醫療資訊網站「Superdrug Online Doctor」訪問咗1,712名英美成年男女，發現有三分之一受訪男士擔心頭髮稀疏嘅問題，更有十分之一男人試過因脫髮問題而失眠。其實冇必要擔心，因為有97%受訪女性表示輕微脫髮對於考慮與對方發展「深入關係」冇影響。至於嚴重脫髮呢？有76%受訪女性話冇問題。網站負責人就話，英美女仔唔介意男人頭髮稀疏，原因係唔少荷里活型格男星都係冇乜頭髮，甚至係光頭，最注目嘅當然係《虎膽龍威》嘅布斯韋利士啦！
喺小弟嘅朋友圈子當中，好多兄弟都已經結婚兼且生埋仔，家陣聚會嘅時候成班兄弟都掛住講湊仔經。而成班兄弟都充滿奴性，係老婆奴個奴，結咗婚之後專心「相妻教子」，少少出去偷食嘅念頭都冇。之不過，佢哋對老婆咁專一，老婆又係咪咁諗呢？呢一層要佢哋兩公婆自己先知，但係喺日本就應該有唔少出軌老婆喇！當地有調查訪問咗300名年齡介乎20至30多歲嘅已婚女性，當中有35%表示會去交友聯誼會，坦言一心背夫偷食！有受訪女性表示聚會時唔會特別掩飾人妻身份，亦唔會介意對方係有婦之夫，更話大家都係為咗偷食而來喎！嘩！估唔到佢哋思想咁開放，仲畀頂綠帽老公戴，真係唔應該！
撰文：賢