有調查發現唔少男女喺床上會諗起其他異性，而專家話咁樣可以令關係更加鞏固。失戀係痛苦嘅，但係好多人分手後仍保留前度嘅照片，到底係為乜呢？相信好多人都想參與天體活動，而巴黎將會開設裸體主義者公園畀大家剝光豬喇！
不得不承認，得一想二係男人嘅思想特性，然而，見異思遷唔係男人嘅專利，早前一個來自捷克嘅調查顯示，有72%嘅受訪成年女性表示自己同男伴交歡嘅時候，曾經諗起其他男人。不過，男人都唔輸蝕，甚至可以話比女人強，因為美國佛蒙特大學亦有同樣調查，受訪者全部係男人，有高達98%受訪者話曾經上床時諗起其他女人。男女都喺床上思遷，會唔會搞到關係好疏離呀？加州州立大學心理學教授Wendy Walsh話其實男女有呢種念頭係好正常，因為大家都希望尋求新意，咁諗則可以令固有關係添上新奇同刺激感覺，同時令大家都唔會超越道德底線，所以發現另一半諗起其他異性都唔使咁驚。不過教授補充一句，想令關係更長久，最好當然唔好畀對方知道自己諗緊第二個啦！
好多事情可以靠努力而換得成果，但係感情事就唔得喇！對方變咗心，想挽留根本係妄想。每次面對失戀，相信好多人同小弟一樣，都會搵方法將對方完全忘記，最直接嘅方法就係刪除對方嘅電話紀錄，再丟晒有關前度嘅物品。之不過，卻有男士會保留前度女友嘅照片，點解呢？日本網站「Menjoy!」早前進行街頭訪問，從眾多有此習慣嘅男士當中搵出保留前度女友照片嘅原因，結果排第三位係對女方仍有依戀，仲好掛住佢；第二位係因為溝到前度女友而令佢感到驕傲；至於第一位係當作美麗回憶，受訪者話同前度女友拍拖相當開心，希望可以保留呢段美好回憶喎！
每次去到海灘同郊區，小弟都好想剝晒衫褲剝晒鞋，真正做到回歸自然，達到天人合一嘅境界！之不過，唔單止喺香港，相信大部分地方都唔容許成年人公然露體，所以小弟去到海灘同郊區都玩得唔夠奔放。如果大家都同小弟一樣，好想徹底咁解放一下，將來去巴黎可以實現願望！早前巴黎副市長Bruno Julliard表示計劃喺巴黎市內開設一個裸體主義者公園，讓大家喺公園剝光豬遊玩一番，現時仲係計劃階段，需要搵一個合適嘅公園，佢補充話時不時見到有人喺塞納河畔半裸曬日光浴，相信大家對此計劃嘅反對意見應該唔會太大，計劃多數可以順利實行。
撰文：賢