有人話佢係開創日本演藝界巨乳風潮嘅女優，亦有人話佢係迷倒男士嘅性感女神，就連蠟筆小新都視佢為夢中女神，究竟佢係邊個？就係喺上世紀90年代初，憑住一對巨乳而紅極一時嘅寫真女優細川典江喇。
家陣日本寫真界有唔少號稱巨乳嘅女優，只係講到巨乳先鋒，卻要數呢位喺1971年9月2日於日本青森縣出生嘅細川典江。由於父親係海上自衞隊軍官關係，佢自小跟隨父親到不同地方居住，曾經喺夏威夷住過一年，及至初中時才返回日本，並喺青森縣讀書，憑住出色嘅珠算而屢次獲獎。1990年高中畢業後，佢參加選美比賽「Miss Magazine」，以37F嘅激凸上圍成功奪得冠軍，從此踏上寫真及演藝生涯。1991年7月推出首本寫真集《Passion Fruit》，同年11月推出第二本寫真集《One Sweet Dream》，作為首位以巨乳做賣點嘅寫真女優，佢不但獲得極高人氣，更開創巨乳偶像風潮，獲得「元祖巨乳女優」嘅稱號。1992年佢成為富士電視台形象代言「F-PROMOTION」，曝光率大增，人氣不斷攀升，之後演出電視劇《愛的刑事》，翌年於《幕末高校生》擔正做女主角。除咗拍電視劇，佢亦主持東京電視台深宵成人綜藝節目《東京情色派》，節目收視成績理想。
除咗活躍於公仔箱外，細川典江喺1993年夥拍飯島愛，參演由橋本以藏執導嘅電影《PuruPuru天使的休日》，成為佢喺影壇嘅處女作。此外，佢又進軍樂壇，推出單曲《Suki Suki Su》，並成功打入Oricon公信榜Top 100。可惜，阿妹成名得快，人氣下滑速度亦相當快，冇耐佢嘅事業跌落谷底，但係佢嘅感情生活卻相當精彩，1999年宣布同美國街頭藝人Brian Hulse訂婚，不過喺2005年解除婚約，及至2007年4月佢同房地產公司社長遠藤久人奉子成婚，不過婚後生活並唔幸福，丈夫經常唔返屋企，後來對方因經營不善而破產兼欠下大筆債項，典江喺2009年宣布離婚。成為單親媽媽嘅佢陷入經濟困境，於是復出搵銀，推出全裸寫真集《Fumming》試水溫，憑住一對令男士想入非非嘅巨乳，寫真集大受歡迎，有書店稱每日賣出超過100本，可惜人氣只係曇花一現，最後黯然淡出。
撰文：魂