從事夜遊業嘅人士都深明，開得夜場最怕冇人氣，冇客即係冇收入，不過太旺場嘅話亦唔係好事，會引起有關方面嘅注意！咁係咪因為地下經營，先至擔心太張揚嘅問題呢？又唔係喎，日本風俗店就係因為生意太旺，要另覓地方開店，但卻因此而引起其他問題。
早前北京一間酒店有女子遇襲，揭發原來係色情招嫖卡片派發者誤以為佢係另一集團嘅人，同佢爭奪地盤而施以暴力驅趕。事件爆出後，發現派發色情招嫖卡片背後，其實有巨大嘅色情產業鏈存在，更有部分賓館及酒店參與其中。有關當局曾大力喺全國各地掃蕩，結果係點？呢啲卡片黨收斂咗一陣避風頭，但係過咗一段時間後，面對巨大嘅利潤吸引又繼續出嚟搵食。好似湖北就有唔少卡片黨死灰復燃，喺酒店內派卡片。話就話已經過咗一段時間，風聲又好似冇咁緊，但係唔代表警方唔做嘢。喺上個月底，當地高新區嘅東山派出所喺轄區內多間酒店採取行動，過程中逮捕咗6名派發卡片嘅男子。有關方面表示，將會展開打擊色情嘅行動，相信業界人士又有排震。
正所謂唔怕神一般嘅對手，最怕豬一樣嘅朋友，呢位喺高雄營運一間色情髮廊嘅陳姓老闆娘，相信對呢句說話有深刻嘅體會。話說57歲嘅佢喺當地經營一間家庭理髮店，分一樓及二樓，一樓主要係接待處，由陳女嘅好姊妹負責，二樓則係提供性服務嘅地方，並由陳女親自招呼。而理髮店嘅做法，除非係熟客，否則要電話預約，如果遇到警方突擊檢查，喺一樓睇舖嘅姊妹就會通知陳女，一直以嚟都相安無事。不過喺上個月中，當地警方接報懷疑店內有人提供性服務，於是派出兩名警員調查，發現一樓嘅門上咗鎖入唔到去，本嚟警方諗住收隊，點知個姊妹咁啱返到嚟，以為佢哋係玩家拿拿臨開門，警員一入店就表露身份並直闖二樓，喺度提供服務嘅陳女即場斷正，被捕時佢大嘆誤交笨友。
東京歌舞伎町林立風俗店，已經見慣不怪，既然係咁，點解最近東京下町購物區內湧現泡泡浴風俗店，日本人會感到如此驚訝？咁就要從下町呢個地方講起。所謂下町其實唔係一個地方，而係一個廣義上嘅地區，當中包括淺草、上野、谷根千等。由於江戶時代呢啲地區屬於平民百姓聚居地，故此至今仍保留地道日本居住環境，生活文化亦傾向保守，因此從未有風俗店喺購物區開設。不過隨住歌舞伎町嘅泡泡浴店被迫遷，吉原同福原嘅泡泡浴店又爭崩頭，因此有風俗店睇中下町一帶開設新店，而位於淺草嘅風俗店「MAX」就係其中一間。對於業界人士嚟睇，呢種另闢地點經營嘅方法，好處係可以開發新地方，吸引新玩家，只係對於當地居民嚟講相當反感，尤其唔想行出行入都見到風俗店大大個招牌。究竟呢種開闢新戰場嘅做法，係咪真係會如風俗界所想咁好呢？一切有待時間驗證。
撰文：魂