「女人心，海底針」呢句話講咗咁多年，至今仍一啲都唔過時，皆因女人個心咁多年都冇人睇得透。唔知係咪咁嘅關係，日本成人遊戲界嘅生力軍Campus，就喺去年11月推出處女作《Natsu Uso -Passing Memories-》，講述擁有睇穿女人有冇講大話能力嘅男主角櫻井宗一郎嘅戀愛及香艷故事。有趣嘅主題令作品相當有人氣，於是呢間公司好快就推出續集作品《Natsu Uso -Ahead of the Reminiscence-》。故事發生喺前作一年後，宗一郎憑住呢種能力溝咗又食咗好多美少女，只係因此亦多了不少委託，而喺解決問題嘅途中，卻令佢獲得「第一問題少年」嘅污名。此時，宗一郎眼前突然出現一個眼神充滿敵意，神情陰沉嘅神秘美少女和泉葵。原來和泉葵曾經同宗一郎有短暫嘅交集，只係一年前兩人因某事而疏遠。今次佢之所以出現，乃係受某個組織所託，前嚟監視以宗一郎為首嘅一夥人。一夜醒來嘅宗一郎，過去嘅記憶不但一次過湧現出嚟，而瞓喺身邊嘅竟然係和泉葵，究竟發生乜嘢事呢？