好多女人都認為男人喺床上只會顧住自己享受，但係一個調查顯示出女人呢種諗法係錯嘅！提到上床，究竟唔同年紀嘅男女，佢哋做愛嘅次數係幾多呢？好多男仔都鍾意皮膚白雪雪嘅女仔，咁擁有古銅色肌膚嘅女仔係咪得唔到男士嘅青睞呢？
世界上好多紛爭，甚至戰爭都係源於彼此不了解，其實有咩事大家都應該心平氣和，唔啱講到啱為止。之不過，唔少女仔就係唔鍾意去了解自己嘅另一半，認為男士上到床只會一味顧住自己享受，忽略女方嘅感受。其實女士們真係誤解晒我哋男人喇！早前英國有一個調查，希望了解男士喺床上最怕遇到邊一種事情，從答案當中可以反映出男士們相當有無私精神，顧及床伴多於自己呀！調查結果發現，男士最怕就係對手有性病，呢個情況不難理解，有邊個男人想「中招」呢？第二就係擔心自己唔能夠令女伴得到高潮，而第三就怕安全套破損引致女方意外懷孕，第四則係怕自己過早洩射，呢方面某程度上亦反映男士驚會令女伴失望，第五就係怕女伴嫌男仔嘅身形唔夠吸引。各位女士睇完呢個調查結果之後，希望你哋唔好再以為男方冇顧你哋嘅感受喇！
歌仔都有得唱：「最心痛是，愛得太遲」，其實愛一個人當然要及時同適時，千祈唔好輕言放棄，仲要適當地向對方表達愛意啦！但係有唔少例子係幾十歲人先嚟拍拖同結婚，就證明愛永遠唔會太遲，但係做愛就一定要趁早享受喇！一個來自英國嘅調查發現，年紀同做愛次數有莫大關係，年齡介乎18至29歲嘅男女平均每年做愛119次，30至39歲每年做86次，即係每個月大約做愛7次，至於年過40歲嘅男女則每年做愛69次，從以上調查結果可見，年齡愈大做愛就愈少。另外，調查仲顯示埋結婚之後嘅做愛次數，有13%已婚男女一年只做愛3次，有45%每個月做愛3次，有34%每星期做2至3次，只有7%受訪已婚男女每星期做愛4次或以上。
小弟一向都幾鍾意黑色，衣服通常都係着黑色衫，一來有型，二來着黑色衫可以顯得自己冇咁肥。之不過，好多人都唔鍾意黑色，包括女仔嘅黝黑膚色！相信絕大部分女仔都認為一白可以遮三醜，就算自己個樣生得唔靚，身材唔算婀娜，只要肌膚白皙，一樣可以得到男人垂青，咁諗法又係咪正確呢？日本一個旅遊網站早前訪問咗1,421名男女，當中有82%女士表示唔想肌膚曬黑，但係就有62%男士話鍾意肌膚黝黑嘅女仔。當中有咩原因令佢哋對呢類女仔情有獨鍾呢？原因第一位係黝黑肌膚嘅女仔睇落充滿健康感覺，個性爽朗，容易相處同溝通，換言之令男士覺得佢哋容易溝，咁就梗係鍾意啦！第二位係佢哋純粹鍾意黝黑肌膚，第三位係覺得黝黑肌膚嘅女仔睇落身材更健美更吸引。女士們以後唔使怕曬黑喇！
撰文：賢