男人無時無刻蠢蠢欲動，每當心郁郁時，都希望搵個索女疏肝一下，結果墮入色情陷阱，呢啲咪叫色迷心竅，衰鹹濕囉！另外，日本風俗業研究點樣吸引到外國玩家捧場，但係有好多文化上嘅分別，箇中問題唔係咁容易可以解決到。
鹹濕可以令男人變得有幾咁盲目？話說北京有位姓牛嘅27歲男子，透過手機嘅社交App搵到一位叫麻田嘅囡囡，對方自稱21歲，唔介意賺取「外快」，牛男聽到後即刻心郁，於是兩人相約到嘅一間歌廳見面。點知牛男到埗後，發現麻田不但係歌廳嘅領班，仲夥同一位王姓男子勒索牛男三千幾元人民幣。食髓知味，麻田及王男用同一手法，勒索另一位24歲韓姓男子兩千幾元人民幣，就喺同一日，佢哋諗住勒索第三位受害者22歲楊姓男子時，早已接報嘅警方即時採取行動，將麻田同王男逮捕歸案。雖然唔知邊位被騙男子報警，但可以肯定嘅係佢哋之所以被騙，全因衰鹹濕！所以話，男人千祈唔好只係用下面諗嘢。
台灣有種叫「野台艷舞秀」嘅表演，唔知大家有冇聽過？要講歷史嘅話，真係要數到幾十年前，據講當時由於娛樂選擇唔多，故此有人就喺鄉下地方搞表演騷，為咗更加有噱頭同吸引力，於是加入香艷元素，後來就變成脫衣舞，而呢種表演就叫做「野台艷舞秀」。今時今日，台灣仍然有呢類表演騷，當中有啲出位嘅艷舞團體，為咗吸引觀眾嘅眼球，甚至會做出三級動作。可能有人會產生遐想，可唔可以同艷舞女郎有下文呢？答案係冇可能，因為佢哋係賣藝不賣身，絕對唔會答應同玩家發生任何關係，所以大家只係睇騷算，唔好癡心妄想喇！
為咗迎接喺2020年舉辦嘅東京奧運，唔少風俗店都磨拳擦掌，希望吸引更多外國玩家光顧，計劃推出「外國人優良店」，專門為外國玩家提供服務。一直以嚟，外國玩家對日本風俗業又愛又恨，愛嘅係希望能夠同風俗孃交手，體驗和味風情，恨嘅卻係唔少風俗店都拒絕招待外國客人。雖然呢個計劃唔錯，但有風俗業者卻抱觀望態度，指現時風俗店之所以不成文規定，唔招待外國客人，理由並非排外，而係在於兩方面嘅問題，一係雙方唔同語言，難以溝通，其次係外國玩家唔了解日本嘅風俗文化，當中最常出現嘅問題，就係佢哋入店後，見到風俗孃時總會質問：「點解個樣同網上嘅相片唔同？」須知道日本風俗孃嘅靚相都經過修圖，而呢個問題日本玩家都知道，只係對外國玩家嚟講就覺得被騙，繼而發生爭拗。究竟點樣解決呢方面嘅問題，睇嚟日本風俗業界要動吓腦筋。
撰文：魂