所謂善有善報，做得善事多自然會有福報，原來做善事對於溝女亦有幫助。暑假係學生哥休息嘅日子，一個外國網站發現暑假仲係感情出軌嘅黃金日子。平時叫錯人哋個名可能無傷大雅，但係喺上床嘅時候叫錯名就大件事，喺日本就有唔少人試過叫錯床伴個名喇！
小弟一向都相信善有善報，惡有惡報，故平生不作虧心事，同時仲會多作善事，經常大破慳囊支持各類籌款活動，而未來我仲會繼續努力做更多善事，參加更多公益活動，因為有研究顯示咁樣對溝女大有幫助。一個來自英國嘅研究，搵到102位未婚成年女性以及105名未婚成年男性協助。研究就發現，當中有定期捐錢做善事以及捐血嘅一批男女，佢哋嘅性伴侶數目，比起冇定期做善事習慣嘅群組更多，對性生活嘅滿足度亦更高。負責研究嘅Daniel Farrelly表示做善事同溝女溝仔上床冇直接關係，之不過以心理學嚟睇，慷慨嘅女性予男仔更容易溝到手嘅印象，至於積極行善嘅男仔令女性覺得佢哋有愛心，值得信賴，會係一個好老公或好爸爸，咁就梗係吸引到女性對佢哋投懷送抱啦！
放暑假學生哥能夠玩足一個多月，仲可以有咁晏瞓到咁晏，唔使朝早起身返學Happy到震！而好多成年人亦一樣咁Happy，有調查發現暑假係出軌嘅高峰時期！約會網站IllicitEncounters.com早前進行網上問卷，訪問咗唔少男女，發現喺暑假當中被伴侶發現出軌而離婚嘅個案比其他日子上升咗7成之多！另一方面，有82%受訪者表示會同家人一齊享受暑假，但係同時亦唔會放棄喺呢段時間與情人偷食，當中10%表示會趁家人外出嘅時候，約情人喺附近地方速戰速決，然後就快快歸家扮無事發生。有62%受訪者就離譜少少，佢哋直情會向家人訛稱有要事而離開屋企幾日去約會情人。而網站仲列出咗一個偷食頻率數據，7月最多人外出偷食，其次就係6月以及9月，原來偷食都有季節性！
唔知係咪我個名難記，故不時有親友叫錯我個名，不過我從來冇介意過，因為佢哋唔係我女友或者老婆，若然連老婆都叫錯我個名咁就慘絕人寰喇！早前日本一個調查喺新宿、涉谷、五反田等地訪問咗唔少女性，想知道佢哋有冇試過喺做愛嘅時候叫錯男伴個名。調查結果發現百分之六受訪女性曾經試過叫錯名，當中有女仔表示叫錯男伴個名係有心咁做，因為想故意激嬲對方，睇吓對方係咪着緊自己，另外亦有人表示因為之前嘅偷食對象實在令佢太舒服，喺激情時不慎叫咗個「姦夫」個名喎。
撰文：賢