300年之後

如果身處喺一個宇宙大航海時代，要喺寂寞嘅宇宙中航行極長時間嘅話，最令大家頭痛係乜嘢問題呢？對於男人嚟講，梗係點解決性慾問題最頭痕啦！呢隻由日本遊戲廠商Softhouse Chara推出，以未來宇宙作為故事背景嘅作品《PLANET DRAGON》就係講述一個咁樣嘅故事。經過長達300年冷凍睡眠後醒番嘅男主角山縣義經，發覺自己不但身處喺無盡嘅宇宙之中，更發現人類可自由自在喺各個星球中航行。

經過一番轉折後，義經獲得一艘宇宙運輸船，並開設宇宙運輸公司，搵嚟兩個優秀嘅航運女機械人幫手。本嚟諗住有兩個美女相伴，加上自己嘅才幹，可以喺運輸業界大展拳腳，點知佢發現世界嘅道德觀有極大嘅改變，輕輕握一下女性嘅手都被視為極為下流嘅行為。由於義經嘅思維仲停留喺300年前關係，試問點可能一時間改變過嚟呢？結果不約而同地被女船員、宇宙女海盜、豪門千金稱佢做「發情獸」，因而令佢間公司嘅生意危危乎，能唔能夠扭轉局勢，就要靠玩家幫手啦！

開發商：Softhouse Chara