唔經唔覺今年就快過咗一半，喺今年日本AV界嘅震撼性消息都幾多，例如有「寫真界之救世主」高橋聖子君臨AV界，亦有上原亞衣含淚同大家講拜拜。喺11月仲會有個全日本AV界都關注嘅大事發生，呢個就係第4次舉辦嘅「AV OPEN」喇！咁嘅盛事當然要同大家睇睇有咩搞作先！
近幾年日本AV界發展蓬勃，除咗AV作品猶如恒河沙數，一班AV女優仲質素優秀，難得嘅係佢哋真正能夠「做好呢份工」，投入又瞓身咁為AV迷嘅眼福而拚命演出！為咗表揚佢哋為AV界作出嘅偉大貢獻，老闆除咗加佢哋人工，AV業界仲聯合起嚟舉辦AV OPEN頒獎典禮，從女優們及其作品中，細心挑選優秀者領受各個獎項。提到AV OPEN，前年起呢件AV界盛事相隔7年之後再同大家見面，因為反應熱烈，得到AV業界人士以及AV迷大力支持，故喺2015年再搞了一屆，去年11月中，小弟仲飛去日本感受現場氣氛添。老實講，喺香港任何一個頒獎禮都未必有佢哋咁好氣氛，當日無論AV界定AV迷都好多人屏息以待等候宣布獎項得主，得獎名單公布，台下掌聲如雷，歡呼聲此起彼落，感覺相當震撼，可見各界對AV文化有幾重視。喺6月1日主辦單位隆重宣布，「AV OPEN 2016」將會再次舉辦，仲會喺11月中舉行頒獎大典，可以話係載譽歸來。
上屆大會就搵嚟AV界嘅頂級新進女優，包括天使萌、佐倉絆及有沢杏做代言人，至於最新一屆搵嘅代言人分量強唔強呢？代表包括KMP集團嘅星美梨香、代表SOD嘅市川雅美及前AKB48成員，出道拍AV以來人氣猶如坐火箭嘅北都集團知名AV廠MUTEKI專屬女優三上悠亞！3位都係當今AV界嘅小天后，無論表現及人氣都可以話強得緊要！佢哋除咗代表所屬嘅AV廠，亦可以話係代表咗當今AV界三股最強勢力，反映出「AV OPEN 2016」的確係有權威性、公信力及獲AV業界嘅鼎力支持。早前3位代言人就密密為大會作性感演出，換上內衣拍攝一系列宣傳照，另外，仲同主辦單位坐低開大會，探討未來可以點樣為「AV OPEN 2016」舉辦宣傳活動。
今屆「AV OPEN」暫時仲喺預備階段，仲叫預備？唔係鐵定11月中隆重舉行咩？現階段係畀AV廠有時間預備拍攝具質素嘅AV作品嚟參選，競逐各個獎項。提到獎項，今年嘅獎項比上屆更多元化，將AV業界嘅有貢獻者分得更加仔細，因為大會新設女優獎、男優獎及監督獎，獲選者將會得到10萬日圓獎金，雖然唔算好多，但難得可以得到如此榮譽，相信得獎者亦唔會介意。另外，AV作品獎項方面，一如以往有別號「日本一」嘅綜合大獎，獎金為150萬日圓，眾多作品亦會被分類為9個不同界別，包括女優部、企劃部、乙女部、綜藝部、素人部、戀物部、Hard部、紀錄片部及人妻部。9個部門嘅冠亞季軍都能夠得到獎金，計埋其他獎項，今次「AV OPEN」嘅總獎金接近千萬日圓，為歷屆之最！但係暫時仲未知有咩作品同女優參賽，大家耐心等候一下先，到7月12日參賽名單公布就可以作網上投票喇！
撰文：賢