有日本成人漫畫家講過，要令作品有叫座力，唔單止要有樣靚身材正嘅女角，仲要有合理嘅劇情，即係指發生情慾戲前，一定要有前奏至得。成人漫畫家七海靜嘅作品就符合晒以上條件，因此出道多年人氣不減，代表作《正確培育大小姐的方法》更成為粉絲嘅收藏品。
現居於日本靜岡縣濱松市嘅七海靜，據佢講呢個筆名嘅靈感係嚟自動畫《世界名作劇場》系列第20部作品《七海的堤可》。早於90年代，佢已經出道畫成人漫畫，憑住優美線條、火辣迷人嘅女角及出色嘅情慾故事，喺1997年獲得成人漫畫月刊《Fantasy Cocktail》邀請發表作品，正式踏上成人漫畫家嘅生涯。
由於佢嘅作品深受歡迎，出道未夠一年，已經推出單行本作品《粉紅小貓》，跟住每年都有推出作品，包括《請愛你…》、《樂園的誘惑》、《我想看看你在你的…》、《Love‧Hacker》、《Don't Peach》等。有成漫迷指佢依家嘅畫風同初出道時比較，冇乜大轉變，唔同嘅地方在於現時佢喺處理故事嘅節奏，以及情慾場面嘅構圖更加成熟。而講到佢嘅代表作，就一定要數喺2013年4月推出嘅《正確培育大小姐的方法》。
《正確培育大小姐的方法》共收錄咗長篇故事《正確培育大小姐的方法》第1至第8最終話，及《三姊妹親加親》同埋《南田學姊與螃蟹》兩個短篇單元作品。從中可以睇到，佢擅長處理情慾場面，更對角色嘅心理有深入構思，令角色更富立體感，而呢點係好多成漫家未必做得到。
至於講到強烈推介部分，當然係點題作品《正確培育大小姐的方法》啦！故事講述豪門彩野川家族嘅唯一繼承人麗華，由於自細過住千金嘅生活，母親亦即彩野川家族嘅話事人，為咗培養麗華嘅獨立性格，並且體驗外面嘅生活，於是命令麗華搬到母子兩代都喺彩野川家打工嘅青年龍雄屋企居住，作為麗華青梅竹馬朋友兼私人管家嘅龍雄，便要肩負起生活指導員嘅工作。
龍雄嘅屋企係一間普通公寓，身嬌肉貴嘅麗華梗係住唔慣，最令佢唔慣嘅係要自己沖涼，於是佢唔理龍雄嘅反對，堅決要對方幫佢擦背。點知經過身體接觸後，不但喚醒血氣方剛龍雄嘅兵器，麗華更係春心大動，主動為龍雄吹奏起嚟。經過呢次事件後，兩人嘅關係起咗微妙嘅變化。
正當麗華唔知點樣理呢段關係之際，佢發現龍雄所租住嘅單位，竟屬於對頭家族國木田家嘅物業，而國木田家嘅千金貴子暗戀咗龍雄好耐。原來龍雄嘅母親曾喺國木田家做過女傭，故此佢同貴子亦可以話係青梅竹馬。當麗華知道呢件事後即呷醋，以肉體懲罰龍雄，卻估唔到肉搏場面畀貴子睇到，兩女爭一男嘅情慾故事就係咁樣開始。那邊廂，彩野川家陷入財政危機，母親決定將麗華嫁畀超級豪門司集團嘅少爺元信，究竟呢段複雜嘅多角關係最後會點收科呢？
作者：七海靜
出版：竹書房
頁數：183頁
撰文：魂