做人最好就係才高八斗，地位高人一等，而男人生得高大亦有着數，有調查發現高佬零舍多性伴。另外，有研究發現大部分女人鍾意扮高潮，之不過佢哋都係為咗滿足男人嘅需要。鍾意自拍嘅人充滿自信，甚至有自戀傾向，原來高學歷嘅人比較喜歡自拍艷照。
小弟一向都抱住知足常樂嘅宗旨做人，家境唔夠人好、讀書唔夠人叻等呢啲統統我都唔介意，但係有一樣嘢令我耿耿於懷，就係天生一副五短身材！大家可能會話，生得矮又點啫？咁你就錯啦！的確係好大件事，因為性伴少好多（口架）！
美國李普曼大學早前進行一項調查，藉此了解一下男人嘅身高同性伴數目有冇關係，訪問咗60,000位成年男士，當中平均高度為矮嘅男士性伴約有5個，而平均身高為高嘅男士就犀利喇，性伴數量係前者嘅2倍！咁你話生得高係咪有優勢好多先！另外，高大而帶肌肉感嘅男士，亦比身材瘦削嘅男士對女性有更大吸引力，小弟我又肥又矮，認真要諗吓下半世如何孤單地度過喇！
人心隔肚皮，人與人之間交往當中嘅真真假假的確係好難分。之但係，所謂人生如戲，戲如人生，孰真孰假其實唔重要，只要大家過得開心咪得囉！美國一個調查就發現，男人鍾意女仔對住佢哋造假，唔係指打假波，而係假扮高潮。調查訪問咗唔少女仔，發現有76%受訪女仔會喺做愛期間假扮高潮迭起。至於男士們又接唔接受呢？結果發現98%嘅受訪男性都知道女方係扮高潮，不過佢哋唔單只唔會討厭女方影后上身，反而鍾意對方咁做，當中有男士表示聽見女方嘅喘氣聲時，唔理係真定假扮，都會令人興奮無比。
家陣要同伴侶互傳愛意好簡單，可以用手機傳訊息，仲可以傳口訊，更加可以傳埋相片同影片，即使分隔兩地一樣可以緊密連繫。情侶之間溝通當然充滿濃情蜜意，說話肉麻又骨痹，甚至傳張裸照畀對方欣賞兼解相思之苦。日本一個針對傳自拍裸照畀愛人嘅行為而進行調查，佢哋訪問咗1,348位男女，年齡介乎20至60歲，當中有5.9%男士鍾意傳裸照畀女伴，而女士亦有4.8%咁做，兩者比率相若。傳裸照嘅比率原來跟學歷亦有關係，鍾意傳裸照畀伴侶嘅受訪者當中有13.5%擁有學位或以上學歷，有4.1%就屬於高中或以下學歷，睇嚟學歷愈高嘅人同時自信心亦愈高，否則點會咁隨便將自己嘅裸照畀人哋睇呢！
撰文：賢