成日聽人講話做人做事唔係只爭朝夕，呢句說話聽落好似好有道理，因為人係要向前走，但係諗深一層，現實好似又唔係咁喎！就以夜遊業為例，真係今日唔知聽日事，所以有錢搵得就搵。
內地嘅賣淫集團，通常由幾個熟悉呢種行業嘅人士組合一齊搵食，但係有集團居然由一個家庭所組成，呢種情況卻係相當罕見。早前湖北宜昌法院對一個喺上年偵破嘅賣淫集團進行宣判，集團成員被審判處10個月至13年不等嘅有期徒刑。呢單案件之所以引人注目，皆因呢個集團係由一家庭組成，1985年出生嘅張姓男子充當老闆，其父親、母親、妻子同細妹等全部都係集團嘅股東。此外，為咗令集團規模更大，不但僱用打手，並通過招募、引誘、容留等手段操控妓女。佢哋早於2007年喺宜昌原樹脂廠臨街開設色情足浴店，由於利潤相當高，故此生意愈做愈大，及至2014年合共開設6間色情場所。為咗壟斷當地嘅色情業，張男要求其他色情場所嘅老闆，按佢嘅規定統一價格收費，並且嚴禁非集團內嘅妓女企街拉客。喺佢哋經營期間，非法獲利超過500萬元人民幣。
有人話最危險嘅地方往往係最安全，究竟係咪真呢？台北一間色情場所開設喺商務旅館裏面，而且距離警局只不過係50米！據悉佢哋之所以選擇喺呢個同警局咁近嘅地方開業，除咗因為商務旅館可以作為掩飾外，佢哋相信最危險嘅地方係最安全。呢間色情場所招攬到台灣旅遊嘅內地女子，並且喺旅館中長期租用房間，提供一樓一式嘅色情服務。點解最後會被警方查獲呢？話說當地警方本嚟展開行動，查封附近另一間提供半套服務嘅色情養生館，點知喺查問間得悉原來警局附近嘅一間商務旅館，經常有濃妝艷抹嘅內地女子出入，經過一番偵查後，終於將呢間色情場所破獲。喺調查期間，警方更發現商務旅館同場所有合作關係，於是將旅館負責人及櫃台逮捕歸案。
正所謂行過路過，千祈唔好錯過，而呢句說話套用喺日本一間人妻風俗店上，就最為適合不過。呢間位於日本千葉縣松戶市嘅「一夜限定的人妻」風俗店，自開業以嚟一直以正宗人妻作招徠，生意相當唔錯。不過面對市場競爭愈嚟愈激烈，令正宗人妻嘅數量相當緊張，呢間風俗店為咗唔想做壞自己嘅招牌，決定為人妻風俗孃提供「短期」工作機會。所謂短期工作嘅意思，就係讓佢哋喺限定時間工作，方法共分為兩種，一種就係推出工作日限定，即係佢哋可以自訂每日、每星期及每個月嘅工作時間；另一種則係一次性限定，即係風俗孃喺指定嘅一日接一個客人，做完之後就唔知佢哋幾時會再做。呢種做法既方便人妻風俗孃返工更具彈性，又可藉手快有手慢冇嘅心態吸引玩家捧場。
撰文：魂