以前話啲男人房事之後就蒙頭大睡，好冇情趣，而家陣男人完事後就即刻睇手機有冇訊息。早期外國興起一系列專門畀大人填顏色嘅畫冊，如果覺得呢啲構圖複雜又冇乜意思，不妨試吓畀成人玩嘅情色畫冊。睇新聞報道有時都幾悶，最近阿爾巴尼亞一個電視台竟然叫女主播真空上陣！
家陣人人機不離手，冇手機仲慘過冇錢，隨時隨地都要（目及）實手機，睇吓有咩新訊息，真係仲忙過返工。呢個情況喺香港常見，原來喺美國亦一樣，一個叫Digital Journal嘅網站就呢個問題進行調查，主要係針對35歲或以下比較鍾意用面書等社交程式嘅人士，發現有27%受訪者每日至少會檢查面書10次以上，睇吓朋友有冇新訊息。呢個行為都唔算好嚴重，因為居然有36%受訪者表示一做完愛就會即刻拎手機檢查有冇新訊息。嘩！咁好似忽略咗枕邊人嘅感受喎！完事之後大家應該攬一陣休息一下，傾多兩句綿綿情話，咁至夠Sweet o架嘛！
有一系列填色畫冊叫《秘密花園》，喺外國好盛行，不過唔係畀小朋友玩，而係畀大人填色，藉此放鬆一下心情，喺忙碌嘅都市生活當中得以減壓。畫冊入面嘅圖案都幾複雜，目的係讓人思考一下點樣填色。之不過，呢類畫冊比較適合女士玩多啲，咁有冇畫冊適合男人，或者男女一齊玩呢？梗係有啦！就係《Sex Position Coloring Book: Playtime For Couples》喇！呢本畫冊係畀成年人填色，當中嘅圖畫全部都係性愛招式，出版人建議男女一齊填色，同時打開情趣話題，咁自然得米啦！
每間電視台都絞盡腦汁提升收視，咁點樣可以刺激到收視呢？事實擺在眼前，最簡單嘅方法就係刺激觀眾嘅眼球！阿爾巴尼亞一間叫做Zjarr嘅電視台最近推出特「色」新聞報道，女主播個個都係妙齡女郎，不時真空上陣，只穿上一件外套中門大開，酥胸半露！呢招一出，成功創造出三贏局面，第一就梗係成功取得高收視啦，第二係市民可以大飽眼福，第三就係班女主播從事新聞主播咁多年都冇人留意，如今酥胸一露即刻有多人認識佢哋。所謂有名就有利嘛！班女主播梗係露得好開心啦！
撰文：賢