日本AV受到好多香港男士歡迎，咁又係，個個AV女優都咁索，而且亞洲人面孔又的確合我哋港人口味。由於日本AV多人睇，於是就有唔少人夢想有朝一日可以同AV女優拍番套AV，之不過，做AV男優唔係咁簡單，就算係AV片場嘅工作人員一樣唔易做，今日就帶大家直擊拍攝現場，了解一下AV背景嘅真實一面啦！
所謂台上一分鐘，台下十年功，大家睇AV嘅時候當然可以輕輕鬆鬆買隻碟，然後安坐梳化「印印腳」食住花生慢慢煲，事實上AV女優同男優在戲中每場床戰都花咗好多工夫，更唔好講唔拍AV嘅時候，如何花心機時間去保養身體喇。另外，幕後一眾工作人員對於一部AV成功拍攝再推出市面亦可以話功不可沒，今日小弟將會為大家披露AV拍攝嘅幕後實況。
一套AV最重要係AV女優，我哋就先嚟睇睇有關招聘AV女優嘅事宜。日本AV集團Prestige擁有唔少極品女優，包括彩美旬果、鈴村愛里及冬月楓等，前兩位女優就係由化名木島嘅負責人一手挑選。木島先生已經從事女優甄選工作十多年，據佢所講現時每月約有一百位女性上嚟應徵做AV女優，之不過合資格嘅只係得百分之一至二，原因係現時AV界競爭空前激烈，質素稍為差少少都難保作品銷量達到合格水平。
木島先生仲公開咗一張P廠用嘅女優面試表格，面試者需要填寫數十項資料，身高、體重、年齡當然走唔甩，仲要填埋自己嘅初夜經歷、性經驗狀況、手淫次數等，幾乎要查埋族譜，故反映出挑選女優嘅工作可謂一絲不苟，木島先生就話咁樣可以方便剔走某部分只係諗住貪玩而拍AV嘅女優，費事公司浪費資金栽培佢哋。另一方面，成功通過初步面試，仲要拍攝裸照以便鑑賞一下胴體是否合格。到正式可以拍AV喇，工作方面亦絕不求其，單係準備工夫已經要十多個工作人員做足半日，因為需要布置場景、調校燈光同攝影，仲要鋪好張床畀男女優作戰得舒舒服服，場地大致上安排妥當，唔入鏡嘅地方一樣有好多項目要準備好，例如要為震棒充電，冬天就要放個暖爐喺拍攝範圍附近。有云三軍未動，糧草先行，便當都要放齊喺枱面，另外，女優仲有一大堆零食，唔好睇小零食嘅作用喎！因為女優演出時，經常會因為壓力又或者男優粗暴嘅對待而心情低落，零食就可以撫慰佢哋嘅心靈，幫女優們充電喇。
一切都準備好晒，但係仲未見女優同男優入閘喎，咩事呢？因為女優仲要化妝同整好個髮型囉！事實上，女優執靚晒個樣之後，化妝師同髮型師都未收得工，要一直喺拍攝期間預備，事關進行AV激戰過程當中，女優嘅妝容隨時被男優搞到走晒樣，呢個時候就要暫停，再執靚佢然後至繼續拍攝。今次現場直擊嘅AV作品就係由P廠專屬女優、上年出道有彩美旬果接班人之稱嘅長谷川瑠衣主演，而瑠衣做好準備工夫後，都仲未可以叫男優埋位，因為要趁佢仲精精神神先拍封面相片及AV碟特別版附送嘅寫真照。拍攝一部AV唔係話一日可以拍起，首日瑠衣先進行一場單對單激戰，回一回氣再嚟一場一女多男混戰，由於男女優嘅體力有限，而一部AV需要三至四場或以上激戰，一日砌咁多場真係會攞人命，故第二天就會分段再拍三段床戲，大家睇吓！拍一部AV真係唔容易！
撰文：賢