自細被教導做人要誠實同忠直，但喺呢個社會打滾咗一段日子後，就會發現好多人喺度呃呃氹氹，一不小心，隨時墮入騙局。不過喺某啲情況卻係唔理你點呃點氹，始終都係呃唔到一世，最終會真相大白！
正所謂「色字頭上一把刀」，為咗可以一親靚女嘅香澤，縱然要花費大筆銀両，仍然有唔少男士甘心將錢財奉上，而呢種心態正正被內地嘅詐騙集團睇中，不但將目標對準內地嘅好色之徒，呢次仲呃到去新加坡同澳洲咁遠。話說呢個網絡詐騙集團以湖南長沙、福建莆田、江西贛州等地作為據點，並搵嚟43位網聊人員透過手機聊天App同新加坡及澳洲嘅華人男士傾偈，佢哋以性感誘人嘅女郎艷照嚟吸引注意，當目標落搭後網聊人員表示可以提供一夜情服務，並託詞由於要躲避當地法規，要求對方購買網絡虛擬充值卡同提供網絡支付密碼，然後佢哋就會喺內地轉換成現金。與此同時，佢哋仲會用各種理由欺騙更多金錢，例如要先繳納保證金、退還手續費等。當男士醒覺時，始發現自己受騙。
喺台灣提供色情服務係違法，因此業界人士一遇到警方臨檢都會走為上着。早前喺台灣嘉義一間色情美容院遇着臨檢時，黃姓負責人即時按下警鐘，提示店內嘅客人同技師馬上逃走，當警方進入美容院時，發現一樓冇晒人，但喺二樓就搵到個驚到慌失失嘅客人同埋衣衫不整嘅技師。而黃姓負責人以為，縱然警方搵到技師都唔會有乜嘢問題，皆因佢早已通風報信，相信技師已清理乾淨晒啲證據。點知呢位技師因太過驚惶失措關係，喺慌亂間不但嚟唔切着番條底褲，仲唔記得處理安全套，結果喺證據確鑿之下，黃姓負責人亦難逃有關罪責。
日本熟女風俗店向來頗受玩家歡迎，然而唔少玩家一直都有個疑問，就係究竟店內嘅熟女係咪真係夠熟呢？佢哋之所以有咁嘅懷疑一啲都唔出奇，皆因呢類風俗店生意唔錯，往往有一啲較為年輕嘅風俗孃駐場搵食。而為咗證明風俗孃嘅真實年齡，一間位於東京嘅「好色熟女」風俗店喺「餐牌」中，附上風俗孃嘅身份證副本，以此證明佢哋嘅出生日期。當然，為咗保障風俗孃嘅私隱，除咗出生日期外，其他資料都會打晒格。至於呢啲資料會唔會造假呢？咁就冇辦法去證明，但大部分客人似乎都相信係真嘅！更何況，風俗孃入房後都會騷多次張身份證畀玩家睇，等玩家喺心理上有多一重保障，佢哋做到咁足，就算係假嘅都心甘命抵啦！
撰文：魂