成人雜誌《花花公子》始創人Hugh Hefner位於比華利山嘅「花花公子豪豪豪宅」Playboy Mansion下個月放售，豪宅建於1971年，佔地20,000平方英尺，共有29個房間，並設有遊戲室、家庭電影院、酒窖、健身房、網球場，擁有四間臥室客房，以及唔知幾多張大床及鹹書等等，要足足80個全職員工先打理得掂，仲有最重要係「買一送一」，因為賣方條件係容許Hugh Hefner免費住到百年歸老！現作價2億美元（約16.5億港紙），消息話若成交更係美國史上最貴房產之一，十幾億對土豪嚟講真係濕濕碎啦！
新聞一出全球爭相報道，外界反應兩極，有人讚豪宅係一個標誌，又係一個傳奇，但亦有人話呢幾年Playboy Mansion已變成「老人院」，除咗嗰批「兔女郎」，基本上出入派對嘅都75歲以上，加上裝修停留喺上世紀八十年代，娘味十足，多份傳媒報道，25歲兔女郎Carla Howe自稱曾喺豪宅住過3年，屋內有陣陣「酸餿味」，令人作嘔喎！
外界抽水就叻，可以真金白銀攞出嚟又有幾多個呢？美國就有一個，佢叫Larry Flynt，即係Hustler老闆，亦即係Playboy嘅死對頭，早幾日nydailynews.com就訪問咗呢位色情大亨，佢對傳媒話有意買起Playboy Mansion，不過唔係用嚟住，而且拆咗佢改建成Hustler辦公室，呢啲咪Power囉！但當問到售價時，大亨Larry就話2億唔係問題，只不過呢間嘢頂多值1億，仲有最緊要係成功交易後Hugh Hefner要即刻離開間屋，否則多多錢都冇得傾！嗱，一個喺舊年就宣布不會再喺美國版刊登裸女寫真，另一個就繼續喪出鹹書，仲有大量四仔見街，唔好講Hustler係咪真係買得到豪宅，單係企出嚟吹兩嘴都攞晒彩啦！
撰文：祖