手機交友程式十分流行，喺英國就有好多男女透過呢類App搵伴侶，更加有唔少人第一次同對方約會就上床。搵錢同上床好似冇乜關係，但係調查發現，做愛次數少同做愛次數達到一定數量嘅群組，兩者嘅搵錢能力相差一截！年紀愈大做事就愈穩陣，之不過喺日本，年長嘅男士做事比年輕小伙子更危險，做愛時使用安全套嘅比率比年輕人為低。
手機聊天軟件可以話改變咗大家嘅溝通方式，家陣小弟想約班兄弟去蒲唔使再好似電話推銷咁逐個逐個打電話問佢哋邊一日有時間，只要喺WhatsApp開個群組，有局就留言問邊一位參加，相當方便，又可以分享相片、影片同聲音檔案，喺朋友之間發表賽後報告就更容易啦。除咗同熟人溝通，呢類軟件仲幫助大家尋找拍拖對象，早前一個英國調查就訪問咗1,500位成年男女，發覺佢哋平均每日花上3小時用手機搵對象以及同對方溝通，有6成人更表示用手機搵對象比其他途徑容易，亦有81%受訪者專門用此方法溝仔溝女。不過，有得溝啫，咁有冇成功例子先？用手機搵到對象再結成夫妻或發展出一段長久關係嘅個案，有關方面就冇調查過，但係發現15%受訪者話同對方第一次約會見面就上床，睇嚟佢哋係想搵炮友多過搵拖友喎！
都市人為咗搵錢，作出好多犧牲，例如犧牲咗照顧家人嘅時間，亦犧牲咗自己嘅健康，當然有唔少人為咗錢而犧牲自己嘅人格啦！點都好，千祈唔好成日顧住搵錢而唔同老婆上床，因為上床次數同搵錢關係密切。外國雜誌《Social Psychological and Personality Science》早前發表咗一份報告，指出佢哋花咗多年時間訪問超過30,000人，經常一番統計之後，發現做愛次數每個月少於一次嘅夫婦，每年平均收入約為15,000至25,000美元，而每周做愛至少一次嘅夫婦每年平均收入則有50,000至75,000美元，兩者收入相差一截！調查負責人George Loewenstein表示夫婦做愛次數穩定而有一定頻密度，可以令大家感情發展良好，情緒更愉快安穩，對搵錢自然亦大有幫助。
政府有好多宣傳片向公眾宣揚安全性愛嘅訊息，效果係點就要有關當局查一查至知，之不過喺一向注重衞生同安全嘅日本，相信當地政府就要加強呢類宣傳喇，因為調查發現佢哋嘅用套比率相當低。該調查訪問咗1,371名年齡介乎20歲至60歲嘅男女，當中一定會用安全套嘅男女只係佔不足兩成。至於男士方面，年齡約為20歲嘅群組當中，約兩成會用安全套，後生仔貪刺激唔用套可以理解，但係40歲群組當中只有約一成會用套，乜年紀大又成熟都唔識得保護身體呀！另外，傳媒得知結果之後特別搵來知名AV監督溜池滾球現身說法，向公眾表示AV當中嘅所謂中出場面其實係假嘅，男優通常都會戴套上陣，另外每一至兩星期就會進行身體檢查保障雙方嘅健康，大家千祈唔好受AV影響搞到冇晒安全意識呀。
撰文：賢