喺香港生活嘅都市人工作繁忙，生活環境又擠迫，莫講話做愛，就算想喺屋企自娛一下都幾麻煩，不過咁都唔可以勒住自己，因為有研究表示男人有一定爆發密度有助減少患上前列腺癌嘅機會。提到做愛，大家又做得幾密呢？好多女仔都介意男友嘅過去，男人又何嘗唔係一樣介意呢？為避免對方產生介蒂，好多日本女仔都隱瞞自己嘅前度男友數目。
以前成日都聽長輩話一滴精等於十滴血，又話爆發得太多可能會導致日後精華素用盡，潛移默化之下好多男仔長大之後都唔會亂咁爆發，以保留珍貴嘅精華素傳宗接代。雖然有助教導男仔唔好縱情色慾，減少佢哋濫交嘅機會，但係睇法一啲都唔科學，美國哈佛醫學院就有研究發現，男士們多爆發有助減低患前列腺癌風險。醫學院喺過去18年來搵咗32,000名身體健康嘅成年男士，以及3,000名患前列腺癌嘅男病人協助研究，發現年齡介乎40至49歲嘅男士每個月爆發21次比起只爆發4至7次嘅男人，患前列腺癌機率減少22%。另外，研究又發現一生當中有20個以上性伴嘅男士比起只得一個性伴嘅，患前列腺癌機會減低28%，雖然係咁，大家都唔好過度亂性，凡事適可而止，以免搞到腎虧。
身邊好多朋友以前都係大玩家，經常日蒲夜蒲，不過佢哋結婚之後就成個人唔同晒，一副老實好丈夫咁款，真係不禁驚嘆佢哋演技之高堪比影帝。佢哋仲話畀我知，維持一段關係少不免裝模作樣，以前幾爛滾都好，喺老婆面前都要話落夜總會淨係飲酒，去骨場就係純粹按摩。我就認為大家有來有往啦，老婆可能都有啲嘢隱瞞呢！喺日本就有唔少女仔隱瞞前度男友數目，受訪嘅200位年齡由25至34歲嘅女性當中，表示前度男友實際數目平均為5人，但係告知男友嘅數目平均為3人，相差2個咁多。另外，亦有36.5%女士喺性經驗方面會向男方報細數。不過，計我話過去已經成過去，最重要係珍惜現在，對方以前有幾多個前度都好，家陣大家相處融洽咪得囉。
所謂食色性也，兩者對人類都一樣咁重要，更加係維持男女關係嘅重要元素，喺英國更加有報告顯示，如果男方唔能夠喺床上滿足到女方，女方就會決絕地提出分手添。一名來自多倫多密沙西加大學嘅學者就搵到2,109名男女協助進行調查，38%受訪者嘅做愛密度係每星期少於一次；近25%則表示每星期至少有一次性愛；22%就話平均每星期做一次；15%男女性慾相當旺盛，表示日日都會做，認真厲害！另外，調查同時發現三分之一女性如果覺得對方喺床上滿足唔到自己就會分手，而男性們喺呢個問題上又出奇地顯示出強大包容力，只有五分之一男性話會因為咁而分手，原來英國女人比男人更加重視性愛喎！
撰文：賢