所謂完美嘅女人，理論上一定係內外兼備，至於完美嘅準則應該係包括外形要夠索，身材亦吸引，內在則係性格體貼又活潑，兼且有自理能力至得。究竟呢種完美女人喺世上存唔存在呢？有！佢就係嚟自天津嘅程小煩。
程小煩呢個名字真係相當有個性，同時睇得出父母希望佢嘅人生中唔會遇到各種麻煩事，而睇見佢嘅模特兒事業一帆風順，似乎如願以償。畢業於沈陽藥科大學嘅佢，早喺2007年時兼職做模特兒，並且喺「新年寶貝」選美比賽中，憑住俏麗嘅樣貌同玲瓏浮凸嘅身材奪得季軍，而得獎之後佢就正式投身模特兒行列，先後喺多本潮流、時裝、化妝以及汽車雜誌上亮相，以迷人嘅形象成功吸引大家嘅眼球。
此外，佢又推出寫真集，盡騷火辣身材，成功喺網絡上引起熱話。及至2010年，佢喺「電競寶貝」選美比賽中成為最後十強，同年喺中國體育模特兒大賽總決賽中，獲得最佳人氣大獎，足證佢唔單止外形吸引，觀眾緣亦相當好。另外，一直以嚟積極喺Cosplay界發展嘅佢，不但經常喺電玩展中見到佢嘅身影，並且喺2012年於上海舉辦嘅ChinaJoy遊戲展中，以遊戲推廣女郎身份為參展遊戲商站台，又擔任多個人氣電玩作品嘅代言女郎。阿妹喺模特兒界發展相當順利，有傳佢將會進軍演藝界！
至於程小煩嘅內在性格又係點呢？佢性格有着天蠍座嘅特質，不但有啲偏執同任性，仲有啲孩子氣同小脾氣，平時亦愛撒嬌，甚至有啲唔講道理添！似乎佢嘅性格麻麻哋，但係睇真啲嘅話，卻會發現佢坦率又純真嘅個性相當討人歡喜。對於工作佢相當認真，尤其係喺模特兒界打滾多年，深知做得唔夠專業嘅話，縱然有幾好嘅天賦本錢，都好難有發展機會。事實上，佢相當識得為自己嘅事業計劃，除咗揀選一啲正面嘅商業工作外，亦會進修增值。原來阿妹不但擅長跳舞，更精於演奏手風琴，另外佢更修讀過演技課程添！
正如程小煩話齋：「機會只會留畀準備充足嘅人」，而佢之所以努力裝備自己，目的係為咗等待一個發揮機會。當然，作為一個人氣建基於群眾嘅模特兒，佢亦深明獲得粉絲嘅支持，先至可以成功上位，故此佢唔理工作有幾咁忙碌，仍然會抽時間透過個人微博同粉絲進行互動，分享最新近況。好似佢早前到泰國布吉島進行拍攝工作，縱然行程幾咁緊密，仍不忘同粉絲報告行程，更上載自拍性感靚相，如此貼心嘅舉動，試問粉絲又點會唔冧呢？
簡介：程小煩內外都咁完美，難怪有人稱佢做完美極致嘅靚女。不過講就係咁講，只係男人都係膚淺，既然佢胸前如此激凸，梗係要落足眼力睇真啲。不論你想深入認識小煩，定係想膚淺咁欣賞阿妹，喺佢嘅個人微博內都可以搵到你想要嘅嘢。
網址：www.weibo.com/u/1792788004
出生地：天津
身高：168cm
三圍：35、26、35
撰文：魂