相信絕大部分男士都試過自娛，美國一個調查發現當地人自娛比率相當高，更加鍾意同朋友嚟個開心分享箇中經驗。做運動前要熱身，至於做愛前平均要做幾耐前戲先足夠呢？情到濃時，男女會嘴對嘴錫錫嚟表達愛意，日本就有專家綜合女仔喺錫錫當中會有咩表現以流露出真情真意。
以前嘅傳統觀念，不論男女自娛都唔係一個健康習慣，過度自娛當然有損身心，不過現代好多醫學專家都表示適度自娛，除咗可以洩解慾火，仲有助減壓、增強免疫力，更加可以幫助了解自己嘅性能力。美國一個情趣用品品牌進行過一項調查，訪問咗超過5,000名年齡介乎18至34歲嘅男女，問及佢哋嘅自娛習慣，結果有94%男士表示試過自娛，當中有60%每星期自娛一次，最驚人嘅係有35%男士日日都會自娛，性慾相當強！女士方面，有83%試過自娛，31%每星期自我滿足一次，只有12%每日都會自娛。自娛係一件相當私人嘅事情，咁佢哋又鍾唔鍾意話畀人知呢？調查結果顯示有85%嘅男女會將當中嘅經驗同朋友分享，睇嚟家陣嘅分享文化真係好盛行。
急色係男人嘅天性，一旦有上床機會就會火速把握，繼而急急忙忙咁埋牙。咁樣可以話係毫無浪漫感覺，亦令樂趣大減。好多調查都顯示，要令女方更容易達到高潮，需要花時間進行前戲。前戲呢方面，美國亦有一個調查，睇吓情侶們嘅前戲習慣係點樣。該調查訪問咗5,117位成年男女，佢哋嘅平均前戲時間為5至9分鐘，而埋牙交歡時間則平均為10至14分鐘。至於佢哋進行最多嘅前戲唔係攬攬錫錫咁簡單，而係換上情趣內衣喺對方面前搔首弄姿，同時錫吓同愛撫一下，其次就係互相推油按摩。而根據另一個相關調查顯示，15.4分鐘係最理想嘅前戲時間，前戲時間不足可能會令大家對上床嘅滿意度下降，如果閣下少做前戲，又或者花太少時間做前戲的話，就要注意一下喇。
男女情到濃時嘅表現相信一定係四目交投，然後再嚟個深情激吻。不過，女方願意激吻到底係半推半就怯於男方嘅淫威底下，定係出於真心真意呢？日本周刊《SPA!》一個專欄作家根據佢自己日夜睇官能小說，再加埋自己嘅親身經驗，綜合出三個特徵，從中可以睇得出女方係咪真情真意。第一就係會聞男方嘅氣味，女性如果對一段感情認真，情到濃意亦會注意氣氛，氣味亦係營造氣氛嘅重要因素，如果女方會認真地聞男方身上嘅氣味，可見佢對感情係認真。第二就係錫錫期間突然喺男方耳邊講一下自己嘅感受，咁樣係一向被動嘅女仔表達感情嘅重要一步。第三就係四目交投一分鐘以上，女仔一向都怕醜，肯咁大膽望實你錫錫，佢對呢份感情自然係珍珠都冇咁真啦！
撰文：賢