現代愛情好複雜！但又有人話，係簡單到你唔信，點解？因為你嘅愛情只係為性囉！一見即砌，搞厭咗唔想再搞就分手，呢啲之唔係現代男女愛情規則！透過交友App溝仔溝女，一晚時間約唔到出嚟執劑就等於失戀，講到尾呢啲根本就唔係真愛。呢本書《Sex From Scratch: Making Your Own Relationship Rules》並冇鼓勵或訓斥任何人如何談戀愛，因為戀愛根本就冇法則可言，作者Sarah Mirk報稱係女權主義者，曾喺報章雜誌撰寫專欄，亦有喺個人網站繪畫有味漫畫，諷刺時下男女性愛觀。而著作呢本書嘅目的係讓讀者重新思考何謂拍拖、兩性關係中應如何共處、戀愛角色及責任，全書192頁，共分8章，作者以例子分享時下情侶經常遇到嘅問題，你可以扮聖女謝絕一切婚前性行為，亦可以去到盡以性會友，問題係你先要了解自己性格，做好戀愛風險評估及過程得益，千祈咪人做你又做呀！