家陣好多人都注意飲食，習慣多菜少肉嘅飲食方式，之不過，食得菜多係咪真係健康啲呢？有研究話蔬菜食得多，精子數量卻會下降。外國大學生一向都予人思想開明又開放嘅印象，最近喺英國劍橋大學有唔少男女學生嚟個裸體演出，佢哋點解咁做呢？就快到聖誕節，日本一個網站請來顏色治療專家透過心理測驗，幫助大家分析邊啲女仔最容易喺佳節得手。
小弟嘅兄長最近學人食齋，唔係同信仰有關，而係因為消化系統一向唔多好，所以要食得清淡啲，小弟見佢食得咁開心，本來都有意跟隨，之不過睇完美國一個研究之後就即刻勒住自己唔好試。美國哈佛大學公共衞生學院就飲食與生殖系統進行過一次研究，發現平常多食生果同蔬菜嘅群組，其精子數量比起唔會特別多食生果蔬菜嘅少約32%！點解會咁呢？唔係話食蔬果健康啲咩？原來蔬果含有殘餘農藥，而農藥有抑制精子生產嘅害處。咁唔通要變成食肉獸？咁又唔係，專家表示大家可以食得謹慎啲，例如士多啤梨、雪梨以及大葉疏菜吸收農藥較多，而豆類以及洋蔥一類根莖類蔬菜就吸收得較少，另外亦可以揀有機蔬菜食用，又或者洗菜嘅時候用水浸耐啲。
早前有段短片喺網上瘋傳，內容係一對年輕男女喺街頭旁若無人咁上演活春宮，後來被人發現兩人都係來自內地嘅大學生，而事後大家都話乜家陣嘅大學生咁開放呀！事實上唔單止呢兩位大學生咁大膽，喺英國唔少大學生亦勇於喺公眾露體。早前劍橋大學舉行一個「最佳美臀獎」比賽（The Best Bums），呢個源自1976年嘅比賽，參加者全部都係校內嘅大學生，佢哋喺校園內不同地方進行裸體拍攝，例如廣場、圖書館、公園等，唔影前只影後，主要露出驕人又誘人嘅臀部。雖然話就話全裸，但係為咗表達某種訊息，參加者都可以着上同戴上唔同飾物配件，只要大致上係裸體就得喇。
好多單身男士都希望可以喺聖誕佳節搵到理想對象，又或者只係簡簡單單咁搵個伴度過一個開心又愉快嘅晚上。日本生活資訊網站「WooRis」就請來顏色治療師久保田美紀進行一個聖誕樹測試，畀大家分析一下邊啲女仔最容易溝，以及係咪你嘅適合對象。鍾意紅色同綠色聖誕樹嘅女仔，代表思想比較傳統，不過咁唔代表冇機會得手，只要男方將節目安排得妥妥當當，令女方感到安心，成功機會就會大增；鍾意藍色聖誕樹嘅女仔，表示佢哋想平平淡淡咁度過聖誕節，所以成事機會比較微，除非男方以誠心態度去接近對方，或者都有一絲機會；鍾意金色聖誕樹嘅女仔，代表佢哋對自己內心認知度不足，好想透過嘗試新事物了解自己同尋找刺激，嗱！唔使多講多都知道呢啲女得手機會率好高啦！
撰文：賢