有傳以前香港專播三級片嘅戲院都好污糟，唔係話靈異嗰種污糟，而係周圍都有啲黐立立嘅神秘物質，加上周圍丟棄用過嘅紙巾，諗起都怕怕。雖然香港嘅三級戲院已經成為歷史，但喺外國仲有好多，而講到最具人氣且好氣氛兼夾企理嘅，相信非呢間位於漢堡紅燈區嘅成人店舖「Sexy Angel」內附設嘅成人影院「Sex Kino」莫屬。講到呢個面積達400平方米嘅戲院就夠晒巴閉，皆因裏面共分為32個唔同主題嘅獨立放映室，當中分別有普通嘅單人同雙人梳化房、有得同囡囡瞓住嚟睇嘅大床房、邊焗桑拿邊睇鹹片嘅蒸浴房、玩住拘束調教睇鹹片嘅愉虐房、滿足偷窺慾嘅偷窺房等，實行將各種好玩元素糅合喺戲院當中，此外佢哋仲會提供毛巾、拖鞋同浴室，等大家睇得舒舒服服，開心過後可以沖埋個涼。至於收費方面，單人收費為6.5歐元（約54港元）可任睇12粒鐘，情侶入場收費則為10歐元（約84港元），如果購買套票嘅話，仲有8折優惠添！