家陣幾乎人人都有一部智能手機，大家對手機更加係愛不釋手，美國一項調查發現唔少人寧願放棄上床都唔願放棄手機。冷感症通常出現於女性身上，但日本就發現當地男士出現此症嘅機率愈來愈高，更加影響到佢哋嘅性功能下降。好多女仔都要求男友對佢哋千依百順，仲要溫柔細心，但係上到床，佢哋卻希望男方展現霸氣來。
家陣手機已經成為我哋生活中不能缺少嘅一部分，大家搭車嘅時候，見到人人都聚精會神咁望實部手機就知喇。而美國人對手機嘅沉迷程度一樣咁嚴重。早前美國一間電訊服務供應商就對大家使用手機嘅習慣進行調查，問及到大家如果有得揀，以一星期為限，期間寧願唔用手機定係其他事物呢？結果顯示出有55%受訪者表示可以唔飲咖啡一星期，63%則表示可以放棄食朱古力一星期，呢兩個答案都唔出奇，因為咖啡同朱古力可以搵其他飲品食物代替。不過，有33%受訪者就話寧願唔做愛一星期都唔想放棄部手機，嘩！原來有人認為玩手機真係開心得過做愛，睇嚟佢哋嘅手機癮都相當嚴重。
傳宗接代係男人其中一個偉大任務，所以男人自懂性開始就對女人嘅胴體有興趣，到老咗依然興致勃勃，大家去開油尖旺地區就會見到唔少七八十歲老人家都難抵街頭艷女誘惑，迷迷糊糊咁被帶上時鐘酒店。之不過，男人對女性嘅渴求好有可能愈來愈低。日本著名時尚雜誌就發現受訪嘅男士當中有43%出現冷感症徵狀，除咗好似女仔咁成日出現手腳冰冷之外，更加影響到佢哋性慾下降，最慘就係想做嘅時候發現力不從心，有勃起困難！醫師森田豐表示愈來愈多男士患上冷感症係同生活習慣有關，例如長期逗留於冷氣房、缺乏運動、少接觸陽光，冇好好為頭、腹同足部保暖，嘩！咁我以後都要做多啲運動同曬多啲太陽，以預防患上冷感症喇！
唔係話賣花讚花香，港男對女仔真係相當好，照顧無微不至，又抵得辛苦，結咗婚之後仲甘願為咗頭家、為咗令老婆可以做少奶奶而仆心仆命打工賺錢，其他城市嘅男仔邊度及得上吖！之不過，有時我就覺得男士們對女仔實在太好，寵到佢哋有公主病，喺床上更加因為太斯文而顯示唔出雄風來！喺美國亦有少少類似情況，來自美國肯塔基大學嘅Kristen Mark博士搵來20名成年女性進行深入訪談，當中唔少都表示家陣嘅男仔實在太斯文。咁點先滿足到佢哋呀？女士們表示唔係話要學《格雷的五十道色戒》咁玩SM提升刺激度，而係男方上床時可以表現得更威猛，發出粗暴嘅咆哮聲，動作亦可以粗魯少少，唔需要戰戰兢兢怕整親女方。另外，受訪女士表示多外出做愛以及使用情趣用具都可以提升情趣，男士們要滿足女伴就謹記呢幾個重點喇！
撰文：賢