有人話只要有夢想凡事可成真，又有人話唔怕挫折最終可達成夢想，日本女成人漫畫家久遠世志就係最好嘅例子。佢喺漫畫路上經歷唔少挫敗，但仍然堅持執筆創作，最後不但喺成漫界闖出名堂，更憑住出色嘅故事布局，奠定劇情類王者地位，而今次介紹嘅呢本《Hundred Game》就係佢最新登場嘅作品。
喺日本千葉縣出生嘅久遠世志，細個時夢想成為一位漫畫家，並將自己嘅作品寄到出版社自薦，可惜當時年紀太細關係，被出版社打回頭，呢件事對佢嚟講係個極大嘅打擊。不過夢想呢樣嘢又點能夠話放棄就放棄呢？後嚟佢以漫畫家玉越博幸助理嘅身份，參加同人漫畫創作，並喺2004年以筆名Meromero子推出首本漫畫《禁斷愛的世界》，憑住踩界嘅大膽內容而備受注目。2005年結婚後，佢以糅合老公名字嘅筆名久遠世志進軍成人漫畫界，喺成人漫畫月刊《COMIC快樂天 BEAST》不定期刊載作品，及推出首本單行本成人漫畫《妄想狂熱》。充滿線條美嘅畫功，加上有趣嘅故事，令佢嘅知名度日益提升，及至2009年佢索性唔再用筆名Meromero子，統一使用現時嘅筆名，同年佢成為一線成人漫畫家，之後佢先後推出《桃色TAYUNISM》、《打開包裹》、《秘密孕婦裝》、《你和我的邪惡》、《極選巨乳娘DX》、《絕對☆後宮》等超人氣作品，而今次介紹嘅呢本懸疑漫畫《Hundred Game》，正係佢最新連載作品。
事實上，喺日本成人漫畫界中極少有懸疑性嘅題材，而可以做到好似《Hundred Game》咁既有色情部分，同時又不失解謎元素嘅作品更係罕有，難怪佢被喻為現時成漫作品中嘅劇情類王者！故事發生喺一個名為館之原市嘅地方，患上絕症嘅男主角杉崎伊織要喺僅餘一年命內，進入隻手遮天嘅政治家今井總司家中，調查喺今井家做家庭教師嘅同父異母嘅細妹天野紗夜自殺一事，以遵守守護紗夜一生嘅承諾。
至於佢點樣調查呢？原來佢透過今井嘅新任秘書，名正言順地入屋進行調查。而佢喺今井嘅大宅內，同今井嘅第二任索爆巨乳老婆美空一齊工作。大宅內除咗美空之外，仲有兩位由今井前妻久倉所生嘅亭亭玉立美少女花音同男孩阿智。人物角色嘅關係同背景睇落好似好簡單，卻原來內裏大有文章。事關美空雖然係第二任老婆兼且係會計總監同法律顧問，但卻不受今井重用之餘，同時對美空嘅偷食行為隻眼開隻眼閉，而美空唔可以離開今井嘅原因，原來係同前妻有關。至於花音係個拒人於千里之外嘅美少女，好似知道自殺一事嘅來龍去脈。阿智亦係一個重點角色，經歷過一場大病後就失聲，極有可能掌握真相嘅關鍵。當然，漫畫嘅懸疑部分固然係重點追看位，只係當中嘅情慾場面更係有令故事畫龍點睛嘅作用，透過各種情慾場面，不但塑造出今井家荒誕嘅一面，更有助故事嘅發展，當中環環緊扣嘅伏線同曲折嘅情節，確實係近年劇情類成漫中嘅出色作品。
漫畫名稱：《Hundred Game》
作者：久遠世志
出版：竹書房
頁數：194頁
撰文：魂