男人欣賞女仔都以身材行先，事實上又唔怪得佢哋，因為女性嘅身材同生育能力有關。女人最怕嫁錯郎，到底邊一種職業嘅男人最容易出軌呢？為咗籌款，可以去到幾盡呢？英國就有一隊女子曲棍球運動員為籌款而剝光豬喇！
睇女仔係男人嘅天性，而好多男仔揀女朋友都會從身材着手，若然個女仔唔靚女但係身材一流，依然可以獲得男方垂青。至於點解男人咁注重女人嘅身材呢？呢個可能同男人嘅原始慾望同傳宗接代有關。蘇格蘭The University of Aberdeen教授John Speakman早前邀請咗約1,300名男士協助研究，安排佢哋欣賞21張女性照片，而每張相中女性嘅身材都有分別。結果發現最受男士歡迎，認為吸引力最強嘅女士，其身高體重指數（BMI）都介乎於17至20，指數屬於正常，身材纖巧而婀娜，並非大家所想像愈豐滿愈多肉就對男人吸引力愈大。教授表示屬於呢個BMI範圍嘅女性一般較少患病、生育率亦相當高，從中可以反映出男士們咁欣賞纖巧又唔會太瘦嘅女仔，好大機會同佢哋早就知道呢類女仔擁有較高生育率有關。
香港女仔對伴侶有好高要求，希望男友靚仔有型之外，仲要學歷高、身家厚，其實以上種種都不切實際，個人認為一個好男友或好老公最緊要就係夠專一，嫁着個老公晚晚出去滾，幾有錢都冇用啦！提到老公出軌，最近英國就有媒體發表咗一篇文章，講述三大容易出軌嘅職業。排名第三位係醫生，原因係佢哋每日都同好多病人接觸，而且喺醫院工作時間長，容易同其他醫護人員發生感情。第二位係教師，其中一個原因係佢哋要面對沉重工作壓力，仲要對住班怪獸家長，迫使佢哋出軌發洩。至於出軌情況最嚴重嘅就係銀行界人士，金錢同權力使人腐化同欲望增加，雖然佢哋未必好有錢，但係就可以處理大筆資金流動，心理上自然如同富豪，風流程度亦然。
錢唔係萬能，但係冇錢就好頭痕，故大家都為咗搵錢而搏晒命，而且仲要諗到頭都爆。要搵錢必然要有所犧牲，但係未必需要好辛苦，好似英國呢班女子曲棍球員咁舒舒服服咁嚟個大解放就得喇。呢隊女子曲棍球隊叫做Lytham St. Annes Hockey Club，當日佢哋帶齊曲棍球裝備隆重出動，唔係去打比賽，而係拍裸體月曆。為數14位嘅球員好多都身材豐滿婀娜，佢哋去到球場拍裸照，扮到好似打緊比賽一樣。雖然佢哋有意無意咁遮住三點，但係火辣身材依然表露無遺，不過點解佢哋要咁做呢？製作呢個2016年裸體月曆嘅原因，主要係籌錢畀當地嘅體育發展基金，幫助推動體育運動以及改善相關設施，可謂相當有意義。
撰文：賢