都市人生活繁忙，好多上班族朝早起身都會匆匆忙忙，忙到要同時進行兩個動作，例如一邊刷牙一邊梳頭，專家就話女性不妨一邊沖涼一邊小便，咁做容易得到高潮喎。早前有美魔女喺書展推出性感寫真集而成為話題，其實日本仲多美魔女，最近就有個全國美魔女選美比賽喇。有謂矮仔多計，之不過調查得知，男人生得矮其性伴數目少於正常高度人士。
為咗遷就擠迫嘅居住環境，一般住宅嘅廁所都唔會太大，沖涼嘅浴缸變成企缸，雖然冇得享受浸浴嘅樂趣，但係就為女士們嘅性福提供良機。健體專家Lauren Roxburgh早前撰文鼓勵女性盡量嘗試喺沖涼嘅時候蹲低小便，咁樣做除咗有助排清膀胱嘅尿液，從而大大減低體內積累毒素嘅機會，成個人都會靚啲。另一方面，女性蹲低小便可以鍛煉盆骨底嘅肌肉，促進血液流通到該處，就有助喺交歡嘅時候享受快感，想達到高潮就更加容易喇。
小弟一向都唔會對女性有年齡歧視，因為我覺得女性每一個年齡層都有其獨特嘅吸引力，故睇AV都唔會只限於睇青春玉女，熟女一樣咁鍾意睇，正確嚟講應該係美魔女至真。提到日本嘅美魔女，上個月尾就上演咗一場美魔女爭霸戰喇。國民美魔女競賽今年已經係第6次舉行，今屆入圍嘅18位佳麗從1,800位招募者當中嚴選出嚟，全部都係年過三十，保養得宜，有美貌、有身材以及有涵養嘅美魔女。比賽當日，喺才藝表演環節讓班美魔女盡情展示涵養，仲有男士們最關注嘅泳裝天橋Show，從中可以見到班美魔女個個都身材苗條，吸引力不遜於妙齡少女。經過一番龍爭虎鬥之後，冠軍由38歲育有兩個小朋友嘅小宮山順子奪得，佢同時榮獲微笑美魔女獎添。
唔知係遺傳定係發育時期運動量不足，小弟嘅身高比好多同輩生得矮。矮的確唔多好，讀書時打籃球明顯唔夠人搶波，踢波亦成日輸喺頂頭槌之上，長大之後出嚟溝女仲慘，班女仔即使同我身高相若，但佢哋着住高跟鞋出街，佢唔使用鄙視嘅眼神望住我，我自己都自慚形穢啦，仲點敢去溝女吖！美國加州Chapman University就身高、體重與性伴數目呢三者嘅關係進行調查，喺60,058位受訪男女當中，有58%男士以及56%女士表示擁有5個以上性伴，29%男士以及23%女士更表示性伴超過14個。超過標準身高以及身高標準嘅男士嘅性伴數量相若，但係身高低於標準嘅矮男，性伴就少過佢哋。不過，調查負責人David Frederick博士就話矮仔唔使咁快判自己死刑，調查同時發現，身高體重指數（BMI）超標嘅男士，其性伴數目比起BMI接近標準或低於標準嘅男士要多喎，好彩我矮得嚟又肥啫！
撰文：賢